Dastlab Jarqo‘rg‘on tumanida amalga oshirilgan o‘rganish doirasida tuman Yo‘llardan foydalanish davlat muassasasida kuz-qish mavsumiga tayyorgarlik jarayonlari, mavjud tuz-qum zaxiralari, ishchilar uchun yaratilgan sharoitlar hamda qish mavsumida xizmat ko‘rsatishga mo‘ljallangan texnikalarning tayyorligi atroflicha o‘rganildi. YHXX rahbari tomonidan muassasa xodimlari va mas’ullariga yo‘llarda harakat xavfsizligini ta’minlash, bolalar ishtirokidagi yo‘l-transport hodisalarini kamaytirish hamda profilaktika tadbirlarini kuchaytirish bo‘yicha tegishli ko‘rsatma va topshiriqlar berildi. Shuningdek, tuman mas’ullari tomonidan M41 xalqaro avtomobil yo‘li va davlat ahamiyatiga ega boshqa yo‘nalishlarda amalga oshirilishi rejalashtirilgan ishlar taqdim etildi.

Denov shahridan o‘tuvchi D170d avtomobil yo‘lining PK93-40 — PK131-00 qismiga yo‘lni ajratuvchi temir to‘siq o‘rnatish masalasi, shuningdek ushbu yo‘lning 0–2 kilometr oralig‘idagi xavfli uchastkani bartaraf etish bo‘yicha mavjud muammolar o‘rganildi va kelgusida amalga oshirilishi zarur bo‘lgan choralar belgilab olindi.

Navbatdagi o‘rganish Sho‘rchi tumanida bo‘lib, tuman YHXG 3-tumanlararo RO‘ va IOB faoliyatini ko‘zdan kechirildi. Joylarda fuqarolarga ko‘rsatilayotgan xizmat sifati, xodimlarning murojaatlarga munosabati, ma’muriy bino va xizmat xonalari o‘rganilib, aniqlangan kamchiliklarni bartaraf etish bo‘yicha viloyat mas’ullariga aniq topshiriqlar berildi.

O‘rganish ishlari viloyat bo‘ylab izchil davom ettirilmoqda.