Yurtimizda fuqarolar bilan ochiq muloqot olib borish, ularni qiynayotgan muammolarga bevosita joyida yechim topish, ayniqsa, yo‘l harakati xavfsizligini ta’minlash borasidagi taklif va tashabbuslarni o‘rganish bugungi kundagi dolzarb masalalardan biridir. Shu maqsadda IIV JXD YHXX rahbariyati tomonidan respublikaning turli hududlarida muntazam ravishda sayyor qabullar tashkil etilmoqda.

Navbatdagi sayyor qabul davomida ham fuqarolar tomonidan yo‘l infratuzilmasidagi mavjud muammolar, piyodalar va transport vositalari harakati xavfsizligini ta’minlash, yo‘l belgilarining yetishmasligi, yoritish chiroqlari, piyodalar o‘tish joylari va transport oqimining tartibga solinishi kabi masalalar ko‘tarildi.

Qabul jarayonida har bir murojaat sinchkovlik bilan tinglandi. Mas’ullar joyning o‘zida tegishli o‘rganish ishlarini olib borib, ayrim muammolarga shu yerning o‘zida amaliy yechim topildi. Jumladan, muayyan ko‘chalarga yo‘l belgilarini o‘rnatish, svetofor chiroqlarini yangilash, xavfli yo‘l kesishmalariga qatnovni tartibga soluvchi texnik vositalarni o‘rnatish bo‘yicha ko‘rsatmalar berildi va bu borada tegishli xizmatlarga topshiriqlar yuklatildi.

Bundan tashqari, qator fuqarolarga qonunchilik doirasida tushuntirishlar berilib, ularning huquqiy savodxonligini oshirishga ham alohida e’tibor qaratildi. Ayrim holatlarda murojaat egalarining vakolatli idoralar bilan bog‘liq masalalari ham o‘rganilib, ular bo‘yicha tezkor tarzda aloqa yo‘lga qo‘yildi.

Sayyor qabullarning asosiy maqsadi — xalq va davlat organlari o‘rtasidagi ishonchli muloqotni mustahkamlash, mavjud muammolarni ortga surmasdan, bevosita joyida hal qilishga erishishdir. Eng muhimi, ushbu tadbir fuqarolarning davlat idoralariga bo‘lgan ishonchini oshirishga, ularning muammolari tinglanayotganini va amalda hal etilayotganini ko‘rsatishga xizmat qilmoqda.