Joriy yilning 5-avgust kuni Ichki ishlar vazirligi Jamoat xavfsizligi departamenti Yo‘l harakati xavfsizligi xizmati va Andijon mashinasozlik instituti o‘rtasida o‘zaro hamkorlik to‘g‘risida memorandum imzolandi.

Memorandumda institutning barcha ta’lim yo‘nalishida, mutaxassisliklarida va ilmiy faoliyatda o‘qitish sohasini takomillashtirish bo‘yicha o‘zaro manfaatli hamkorlikni rivojlantirish, ikki tomon kadrlar malakasini oshirish, o‘quv dasturlari va adabiyotlar, uslubiy majmualarni ekspertizadan o‘tkazish, media vositalarini yaratish, o‘qitishning zamonaviy innovatsion shakl-usullari, interaktiv, masofaviy turlarini ishlab chiqish, davlat ta’lim standartlari asosida yaratilgan uslubiy majmualarni aprobatsiyadan o‘tkazish hamda harakat xavfsizligini oshirishda ilmiy asoslangan tavsiyalar ishlab chiqish belgilangan.

Bundan tashqari Andijon mashinasozlik institutida yo‘l xarakati qoidalari bo‘yicha sinov poligonini tashkil etish, institutda mavjud yo‘nalishlar va mutaxassisliklarning o‘quv mashg‘ulotlari sifatini oshirish maqsadida amaliyot tajribasiga ega bo‘lgan mutaxassislarni jalb etish va talabalarning o‘quv-ishlab chiqarish amaliyotlarini doimiy o‘tkazishni tashkil etish ham belgilangan.