Joriy yilning 15-may kuni Prezidentimiz tomonidan o‘tkazilgan kengaytirilgan selektor yig‘ilishida hududlarda, ayniqsa Namangan viloyatida, voyaga yetmaganlarning haydovchilik huquqiga ega bo‘lmasdan turib transport vositasini boshqarish holatlari ko‘paygani ta’kidlandi.

Mazkur huquqbuzarliklarga chek qo‘yish maqsadida Ichki ishlar organlari, prokuratura va boshqa mutasaddi tashkilotlarning mas’uliyatini yanada oshirish lozimligi aytildi. Shuningdek, amalga oshirilgan ishlar tanqidiy muhokama qilindi.

Shu bois, 16-may kuni viloyat hududida sodir etilishi mumkin bo‘lgan avtohalokatlarning oldini olish maqsadida Ichki ishlar vazirligi rahbariyati tomonidan tungi xizmatga jalb etilgan ichki ishlar organlarining sohaviy xizmat xodimlari bilan xizmat oldi yo‘riqnoma o‘tkazildi.

Unda xodimlarga tungi vaqtda fuqarolar osoyishtaligini ishonchli ta’minlash, yuz berishi mumkin bo‘lgan hodisalarning barvaqt oldini olish hamda qoidabuzarliklarga nisbatan murosasiz munosabatda bo‘lish lozimligi tushuntirildi. Shuningdek, xizmat intizomi va qonunchilikka rioya etish har bir xodimning burchi ekani alohida ta’kidlandi.

Ayniqsa, voyaga yetmaganlarning transport vositasini boshqarish holati aniqlangan taqdirda, ularga avtomobil kalitini berib qo‘ygan kattalar — ota-onalar yoki boshqa shaxslarga nisbatan ham javobgarlik muqarrarligi ta’minlanishi lozimligi bildirildi.

Shundan so‘ng, tungi xizmatga jalb etilgan xodimlar viloyat bo‘ylab tegishli hududlarga taqsimlanib, xizmat faoliyatini boshlashdi.