Tashrif davomida YHXX rahbari viloyat IIB JXX YHXB Ma’muriy amaliyot markazi, RO‘ va IOB binolaridagi xizmat jarayonlari va moddiy-texnika bazasi bilan tanishdi.

Shuningdek, Termiz tumanidagi “Yangi O‘zbekiston” massivida barpo etilayotgan amfiteatr maydoni va Yangi yil archasi o‘rnatilishi rejalashtirilgan hudud ko‘rib chiqilib, piyodalar yo‘laklari va avtoturargohlarning tayyorgarligi baholandi.

Termiz shahridagi “Manguzar” YPX maskanida xodimlar bilan suhbat o‘tkazilib, xizmat jarayonlari va muammolari tinglandi. Maskandagi dam olish xonalari, tibbiy punkt, o‘quv xonalari va kuzatuv kameralari ko‘rikdan o‘tkazilib, kamchiliklarni bartaraf etish bo‘yicha topshiriqlar berildi.

Surxondaryo viloyati hokimi raisligida barcha tashkilot va korxonalar rahbarlari hamda shahar-tuman hokimlari ishtirokida videoselektor o‘tkazilib, joriy yilning 11 oyida sodir bo‘lgan YTHlar muhokama qilindi. YHXX rahbarining ma’ruzasi tinglanib, avariyalarning oldini olish, harakat xavfsizligini ta’minlash va yo‘l infratuzilmasini yaxshilash borasidagi kamchiliklar ko‘rsatib o‘tildi. Ayrim mas’ullarga intizomiy choralar ko‘rildi.

Temir yo‘l kesishmalarini xavfsizlashtirish, svetofor hamda tezlikni aniqlovchi radarlarni o‘rnatish va ta’mirtalab ko‘priklarni ta’mirlash bo‘yicha aniq vazifalar yuklatildi.

Shuningdek, voyaga yetmaganlar ishtirokidagi YTHlari ham tanqidiy muhokama qilinib, maktab va MTTlardagi yo‘l harakati sinfxonalari va maydonchalaridan samarali foydalanish, targ‘ibot ishlarini kuchaytirish bo‘yicha topshiriqlar berildi.