IIV JXD Yoʻl harakati xavfsizligi xizmati rahbari Saidov Olim Choriqulovich Jizzax hamda Sirdaryo viloyatlaridan oʻtuvchi avtomobil yoʻllarida yoʻl-patrul xizmati xodimlarining tungi xizmat faoliyati hamda Ekspluatatsiya-montaj boʻlinmasi xodimlari tomonidan yoʻllardagi yotiq chiziqlarni chizish, svetofor uskunalarini koʻrikdan oʻtkazish va yangilash boʻyicha amalga oshirilayotgan ishlarni oʻrgandi.

Tungi vaqtda yoʻl-transport hodisalarining oldini olish, harakat xavfsizligini taʼminlash boʻyicha xizmatga jalb etilgan xodimlarning faoliyati oʻrganilib, aniqlangan ayrim kamchiliklar yuzasidan hududiy YHXB rahbarlariga tegishli koʻrsatmalar berildi.

Oʻrganishlar davomida yoʻl infratuzilmasining holati, belgilangan tartib hamda meʼyorlarga amal qilingan holda jihozlanganligi ham koʻzdan kechirildi. Yotiq yoʻl chiziqlarini yangilash yuzasidan ish olib borayotgan ishchi guruhning ham faoliyati oʻrganilib, xalqaro, davlat hamda mahalliy ahamiyatdagi yoʻllarda xavfsizlikni taʼminlash choralarini yanada kuchaytirish boʻyicha masʼullarga topshiriqlar berildi.