Bugungi kunda yo‘l-transport hodisalarining oldini olishda xalqaro tajriba, ilmiy asoslarga ega bo‘lgan zamonaviy metodikalarning o‘rni beqiyos. Shu bois, hozirda soha rivoji uchun yangicha axborot texnologiyalari yordamida tizimni raqamlashtirish barobarida keng jamoatchilik, ilmiy darajaga ega bo‘lgan olimlar singari katta malakaga ega bo‘lgan mutaxassislarning ham takliflari keng ko‘lamda o‘rganilmoqda.

IIV JXD Yo‘l harakati xavfsizligi xizmati ma’muriy binosida tashkil etilgan davra suhbatida aynan shu jihatlarga keng e’tibor qaratildi. Ichki ishlar vazirligi tizimidagi ta’lim va ilmiy muassasalar, shuningdek, nufuzli oliy ta’lim muassasalari professor-olimlari ishtirokida o‘tkazilgan tadbir avvalida ayanchli avtohalokatlar aks etgan videorolik namoyish etildi. Shundan so‘ng, bugungi kunda avtoavariyalarning oldini olish borasida Xizmat tomonidan amalga oshirilayotgan chora tadbirlar to‘g‘risida qisqacha ma’lumot berilganidan so‘ng, yig‘ilganlar ishtirokida yo‘l harakati xavfsizligini ta’minlash sohasidagi mavjud muammolarni chuqur tahlil qilish, ilmiy yondashuvlar asosida samarali yechimlarni ishlab chiqish va amaliyotga joriy etish mexanizmlari muhokama qilindi.

Soha taraqqiyoti uchun olib borilayotgan ilmiy izlanishlar e’tirof etilib, qizg‘in savol-javob, keng munozaralar davomida kelgusida bajarilishi lozim bo‘lgan bir qator ishlar belgilab olinib, ijrosi yuzasidan mas’ullarga topshiriqlar berildi.

Bu kabi ilmiy anjumanlar kelgusida yo‘llarda inson xavfsizligini ta’minlash, baxtsiz hodisalarning oldini olish yo‘lidagi muhim qadam bo‘lib xizmat qilishi shubhasiz.