Ijtimoiy tarmoqda "Qora Jentra minib olgan otasining erkatoylari" sarlavhasi ostidagi video tarqaldi. Videoda "Lacetti" rusumli, 10 S605VA davlat raqam belgili avtomobil haydovchisi boshqaruv vaqtida xavfsizlik kamaridan foydalanmaganligi, yo‘lovchi avtomobilning lyuk qismidan tana qismlarini chiqarib olganligi aks etgan.

Video yuzasidan Toshkent viloyati IIBB YHXB xodimlari tomonidan surishtiruv olib borilganda 2004 yilda tug‘ilgan A.O. mazkur avtomobilni me’yoriy hujjatlarsiz boshqarganligi aniqlandi. Holat yuzasidan o‘rnatilgan tartibda hujjatlar rasmiylashtirilib, transport vositasi vaqtincha saqlash uchun jarima maydoniga joylandi. Shuningdek, hozirda yo‘lovchining shaxsiga aniqlik kiritilmoqda.

Barcha ota-onalardan haydovchilik guvohnomasiga ega bo‘lmagan farzandlariga avtomobil boshqarishga ruxsat bermasliklarini, haydovchilar yo‘llarda qoidalarga rioya qilishlarini, yo‘lovchilar avtomobil harakatlanayotgan vaqtda salondan tana qismlarini (qo‘ldan tashqari) chiqarmasliklarini so‘raymiz.