Bugun, 2022-yil 17-fevral kuni soat 11:00 larda, Toshkent shahar, Bektemir tumani, TXAY koʻchasi yoqasida joylashgan “Qoʻyliq” qurilish mollari bozori yaqinida, “Equinox” rusumli avtomobil haydovchisi toʻxtash taqiqlangan joyga toʻxtagan vaqtda YPX xodimi tomonidan transport vositasi avtoturargohga qoʻyilishi boʻyicha haydovchi ogohlantirilgan. Xodimning murojaatiga eʼtibor qaratmagan haydovchi bozor ichiga kirib, taxminan 5-10 daqiqada avtomobilining yoniga qaytib kelgan. YPX xodimi haydovchiga murojaat qilib, qoidani buzganligini, tegishli meʼyoriy hujjatlarini taqdim qilishini soʻragan vaqtda, haydovchi qonuniy talabni bajarmasdan avtomobilini boshqarib ketgan va taxminan 500 metr masofa uzoqlikda xizmat olib borayotgan yana bir YPX xodimi tomonidan toʻxtatilgan. Oʻzaro muloqot jarayonida haydovchi YPX xodimlarini turli soʻzlar bilan haqoratlab, qonuniy talabni bajarmaslikda davom etib, faol qarshilik koʻrsatgan. YPX xodimlari tomonidan haydovchi, 1982-yilda tugʻilgan V.P.ga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 128 prim 6 (transport vositalari haydovchilarining toʻxtash yoki toʻxtab turish qoidalarini buzishi) hamda 194-moddalari (ichki ishlar organlari xodimining qonuniy talablarini bajarmaslik) tartibida maʼmuriy bayonnoma rasmiylashtirilib, avtomobil vaqtincha saqlash uchun jarima maydoniga qoʻyilgan. Toʻplangan hujjatlar tegishli tartibda koʻrib chiqishlik uchun Jinoyat ishlari boʻyicha Bektemir tumani sudiga yuborilishi choralari koʻrilmoqda.

Jarayonlar yuzasidan qoʻshimcha maʼlumot beriladi...