Ijtimoiy tarmoqda "Nexia-3" rusumli, 60 M799OA davlat raqam belgili avtomobil haydovchisi transport vositasiga yalt-yalt yonuvchi mayoqcha o‘rnatganligi aks etgan video tarqaldi.

Video yuzasidan Andijon viloyati IIB YHXB xodimlari tomonidan surishtiruv ishlari olib borilib, haydovchi tegishli ruxsatsiz avtomobil yon oynalarining tusini qoraytirganligi, me’yoriy hujjatlari to‘liq emasligi va transport vositasiga ruxsat etilmagan mayoqchalar o‘rnatganligi bo‘yicha O‘zbekiston Respublikasi Ma’muriy javobgarlik to‘g‘risidagi Kodeksning 126-moddasi 1-qismi, 127-moddasi 2-qismi hamda 135-moddasi 1-qismi tartibida bayonnoma rasmiylashtirildi va avtomobil vaqtincha saqlash uchun jarima maydoniga qo‘yildi. To‘plangan hujjatlarni tegishli tartibda o‘rganib chiqishlik uchun jinoyat ishlari bo‘yicha Shahrixon tumani sudiga yuborish choralari ko‘rilmoqda.

Barcha haydovchilardan qoidalarga rioya qilishlarini so‘raymiz.