Ijtimoiy tarmoqda yuk avtomobili haydovchisi hamda yo‘l-patrul xizmati xodimi suhbati aks etgan video tarqalib keng jamoatchilik tomonidan muhokamalarga sabab bo‘lmoqda.

2023 yil 26 iyun kuni soat 19:20 larda "Man" rusumli, davlat raqam belgisi 40X593BB bo‘lgan yuk avtomobili haydovchisi Vazirlar Mahkamasining 2020-yil 28-maydagi 337-sonli qarori talablarini buzgan holda A-373 "Toshkent-O‘sh" avtomobil yo‘lining 193-kilometrida joylashgan vazn va hajm parametrlarini nazorat qiluvchi punktga kirmasdan yo‘lida davom etganligi uchun "Chinor" YPX maskanida IIV JXD YHXX "Qamchiq" otryadi bo‘yicha YPX katta inspektori B.Ortiqov tomonidan to‘xtash ishorasi berilganda to‘xtamasdan harakatda davom etgan.

YPX xodimi B.Ortiqov xizmat avtomobilida mazkur haydovchining ortidan kuzatib borgan va A-373 avtomobil yo‘lining 198-kilometrida to‘xtatib, o‘lchov punktiga nima sababdan kirmaganligini va me’yoriy hujjatlarini taqdim etishini haydovchidan so‘ragan.

Haydovchi YPX xodimida mavjud bo‘lgan bodikamera moslamasi bo‘yicha e’tirozlar bildirib, hujjatlarini taqdim etishdan bosh tortgan va xodimning qonuniy talabini bajarmasdan avtomobilni boshqarib yo‘lida davom etgan. Holat yuzasidan YPX xodimining bildirgisi asosida surishtiruv olib borildi va "Man" rusumli, 40X593BB davlat raqam belgili avtomobil haydovchisi, 1995 yilda tug‘ilgan O. A. ga nisbatan O‘zbekiston Respublikasi MJtKning 194-moddasi tartibida ma’muriy bayonnoma rasmiylashtirildi.

Rasmiylashtirilgan bayonnoma hamda to‘plangan hujjatlar o‘rnatilgan tartibda sud organlari tomonidan ko‘rib chiqiladi.

Barcha haydovchilardan yo‘llarda qoidalarga va belgilangan talablarga rioya etgan holda harakatlanishlarini so‘raymiz.