Joriy yilning 3-fevral kuni ijtimoiy tarmoqda “Orlando” rusumli avtomobil haydovchisi tomonidan sodir etilgan qoidabuzarlik holati boʻyicha “Nexia-3” rusumli avtomobil egasiga nisbatan jarima solish toʻgʻrisidagi qaror chiqarilganligi aks etgan surat va izoh tarqaldi.

Mazkur xabar oʻrganilib, Toshkent shahar IIBB JXX YHXB masʼul xodimi tomonidan xatolikka yoʻl qoʻyilgani, yaʼni, 2022-yilning 22-yanvar kuni soat 08:37da Toshkent shahar, Yangihayot tumani, Binokor mahallasi, Sholikor koʻchasi 12-uy qarshisida, “Orlando” rusumli, 40N855RA davlat raqam belgili avtomobil haydovchisi 70 km/soat tezlik chegaralangan joyda 77 (77-5=72) km/soat tezlikda harakatlanganligi maxsus moslama yordamida qayd etilgan boʻlib, qayd etish vaqtida avtomatik tarzda 40N855RA davlat raqam belgisidagi “N” harfi “M” boʻlib, 40M855RA tarzida notoʻgʻri qayd etilganligi, masʼul nazoratchi xodimning eʼtiborsizligi sabab, ushbu jarima “Nexia” rusumli, 40M855RA davlat raqam belgili avtomobil mulkdorining yashash manziliga yuborilganligi maʼlum boʻldi.

Ayni vaqtda ushbu qoidabuzarlik yuzasidan “Nexia” rusumli, 40M855RA davlat raqam belgili avtomobil mulkdoriga nisbatan tasdiqlangan jarima solish toʻgʻrisidagi qaror belgilangan tartibda bekor qilinib, “Orlando” rusumli 40N855RA davlat raqam belgili avtomobil mulkdori F.K.ga nisbatan tasdiqlangan.

Shuningdek, ushbu xatolikka yoʻl qoʻygan nazoratchi masʼulga nisbatan Toshkent shahar IIBB JXX YHXB tomonidan xizmat tekshiruvi oʻtkazilmoqda.