Andijon viloyati IIB YHXB Roʻyxatlash va imtihon olish boʻlimida xizmat koʻrsatib kelgan “Xalq banki” kassa shaxobchalari vaqtincha yopilganligi sababli fuqarolarga avtomototransport vositasini davlat roʻyxatidan oʻtkazishdagi toʻlovlarni amalga oshirishda noqulayliklar yuzaga kelgan.

Ushbu noqulayliklarni bartaraf qilishda “Oʻzbekiston pochtasi” aksiyadorlik jamiyati xizmatidan foydalanilmoqda.

Oʻzbekiston Respublikasi Prezidentining 2020-yil 14-dekabrdagi “Pochta aloqasi xizmatlarini koʻrsatish tizimini tubdan takomillashtirish chora-tadbirlari toʻgʻrisida”gi PQ-4921-son qaroriga asosan, mijozlarga qulaylik yaratish maqsadida toʻlovlarni qabul qilish avtomatlashtirilgan tizimini yanada mukammallashtirish maqsadida “Avval” toʻlovlar va pul oʻtkazmalari kompleks axborot tizimi ishlab chiqilgan.

Ushbu tizim orqali fuqarolarga xizmat koʻrsatish maqsadida “Oʻzbekiston pochtasi” aksiyadorlik jamiyati “Aloqa bank” bilan shartnoma qilgan holda toʻlovlardan ustama haqi sifatida olingan mablagʻlar ustiga 2 foiz xizmat uchun toʻlov undirilishi belgilangan. Ushbu belgilangan ustama haqini qabul qilish boʻyicha “Oʻzbekiston pochtasi” aksiyadorlik jamiyatining 111-son buyrugʻi tasdiqlangan.