2024-yil 12-dekabr kuni soat 22:45 larda Toshkent shahar, M.Ulugʻbek tumani, Parkent koʻchasida tungi xizmatga jalb etilgan YPX xodimlari N.Abdullayev va A.Yusufbekovlar tomonidan davlat raqami 01V617PC boʻlgan “Cobalt” rusumli avtomobil haydovchisiga toʻxtash haqidagi ishora berilgan. Haydovchi qonuniy talabni bajarmasdan harakatni davom ettirgan.

Koʻrilgan choralar natijasida avtomobil toʻxtatilib, haydovchi, 2004-yilda tugʻilgan A.S.dan tegishli meʼyoriy hujjatlari soʻralganda, u turli vajlarni keltirib, hujjatlarni taqdim etishdan bosh tortgan va YPX xodimlariga qarshilik koʻrsatgan. Shundan soʻng, haydovchi va YPX xodimlari oʻrtasida tortishuvli vaziyat yuzaga kelgan.

Oʻrganishlar davomida A.S.ning transport vositasini boshqarish uchun hech qanday meʼyoriy hujjatlari yoʻqligi maʼlum boʻlgan. Holat yuzasidan tegishli tartibda maʼmuriy bayonnoma rasmiylashtirilib, transport vositasi vaqtinchalik saqlash uchun jarima maydoniga qoʻyilgan.

Mazkur holat boʻyicha xodimlarning xatti-harakatlari yuzasidan Toshkent shahar IIBB JXX YHXB masʼul xodimlari tomonidan xizmat tekshiruvi tayinlangan.