Oʻzbekiston Respublikasi IIV huzuridagi “Innovatsiya loyihalari va aholiga servis xizmatlar koʻrsatish markazi” DUK tomonidan Andijon viloyati IIB YHXB ROʻ va IOBda arizalarni yozish uchun 9 ta joy mavjud boʻlib, ularda uzoq vaqt navbatda turish holatlari kuzatilmaydi. Koʻrsatilgan xizmatlar uchun toʻlov stavkalari 10.10.2020-yilda DUK direktori tomonidan tasdiqlangan jadval asosida amalga oshiriladi.

Hozirda avtomototransport vositalarini roʻyxatdan oʻtkazish va qayta roʻyxatlash uchun 27000 soʻm, davlat raqam belgilari uchun 405.000 soʻm, transport vositasi roʻyxatdan oʻtkazilganligi toʻgʻrisidagi guvohnoma uchun 189.000 soʻm jami 621.000 soʻm toʻlov mavjud. Ayni vaqtda ushbu toʻlovlar Oʻzbekiston pochtasi Andijon viloyati AJ Baliqchi tuman TPAB tomonidan amalga oshirilayotgan boʻlib, kompyuter dasturida 2% xizmat xaqqi uchun qoʻshimcha toʻlov undirilmoqda.

Oʻzbekiston Respublikasi Vazirlar Mahkamasining 09.03.2021-yildagi 125-sonli “Transport vositalarini majburiy texnik koʻrikdan oʻtkazish tartibini takomillashtirishga doir qoʻshimcha chora-tadbirlar toʻgʻrisida”gi qaroriga asosan texnik koʻrikdan oʻtkazish xususiy sektor, yaʼni tadbirkorlik subyektlari tomonidan amalga oshiriladi va toʻlov stavkalarini tadbirkorlarning oʻzlari belgilaydi. YHX xizmati ROʻ va IOB inspektorlari tomonidan avtomototransport vositalarini roʻyxatdan oʻtkazish vaqtida agregat raqamlari mos kelishini birma-bir solishtiradilar va bu uchun toʻlovlar mavjud emas.

2022-yil 1-yanvar kunidan boshlab ayrim yigʻimlar bekor qilinganligi sababli avtotransport vositalarini roʻyxatdan oʻtkazish jarayoni oʻtgan davrlarga nisbatan 3-4 barobarga oshganligi sababli bir kunda 500 dan ortiq transport vositalari YHX xizmati roʻyxatidan oʻtmoqda. Respublika miqyosida joriy etilgan “Transport vositasi roʻyxatdan oʻtkazilganligi toʻgʻrisidagi guvohnoma” barcha viloyatlar uchun bitta serverga ulangan boʻlib, chop etish jarayoni keskin koʻpayib ketayotganligi uchun tarmoqda ayrim uzilishlar sababli navbatlar yuzaga kelmoqda.

Yuzaga kelayotgan noqulayliklarni bartaraf etish maqsadida Andijon viloyati IIB YHXB ROʻ va IOB, TRIBlariga qoʻshimcha kuch va vositalar jalb etildi.