2022-yil 15-may kuni Andijon viloyati, Jalaquduq tumani, “Oʻroqchitepa” MFY hududida xizmat olib borgan YPX xodimi U.Muxtorov tomonidan “Captiva” rusumli avtomobil haydovchisi toʻxtatilgan. Haydovchi, 1979-yilda tugʻilgan Sh.X. “Tico” avtomobiliga tegishli boʻlgan davlat raqam belgisini “Captiva” rusumli avtomobilga oʻrnatib, boshqarib yurganligi aniqlangan. Qoidabuzarlik holati boʻyicha bayonnoma tuzilib, avtomobil vaqtincha saqlash uchun jarima maydoniga qoʻyilgan.

Shundan soʻng, oradan vaqt oʻtib fuqaro Sh.X. tanishlari I.T. hamda Sh.Sh.lar bilan YPX xodimi U.Muxtorovning yoniga kelgan. YPX xodimi qonuniy chora koʻrilganligini tushuntirgan vaqtda fuqarolar xodim bilan janjallashib ziddiyatli vaziyatni yuzaga keltirgan. Mazkur vaziyatda fuqarolar xodimga xizmatda foydalanish uchun biriktirilgan aloqa vositasi, koʻkrak nishon belgisi hamda planshet moslamasini olib voqea joyidan yashiringan.

Xodimning bildirgisi asosida, tezkor xodimlarning aralashuvi bilan uchchala fuqarolar tuman IIBga olib kelingan. Ular tomonidan olib ketilgan vositalar qaytarib olingan.

Mazkur holat yuzasidan 2022-yil 16-may kuni Jalaquduq tumani prokuraturasi tomonidan fuqarolar Sh.X., I.T. va Sh.Sh.larga nisbatan Oʻzbekiston Respublikasi Jinoyat Kodeksining 219-moddasi bilan jinoyat ishi qoʻzgʻatilib, ularning uchchalasi ham Jinoyat Protsessual Kodeksining 221-moddasi tartibida ushlangan. Hozirda tergov harakatlari olib borilmoqda.