O‘zbekiston Respublikasi Vazirlar Mahkamasining 2017-yil 2-martdagi 116-son “Milliy haydovchilik guvohnomasining hamda avtomototransport vositasi ro‘yxatdan o‘tkazilganligi to‘g‘risidagi guvohnomaning yangi namunalarini joriy etish chora-tadbirlari to‘g‘risida”gi qaroriga muvofiq plastik shakldagi guvohnomalar 2017-yil 1-oktabrdan joriy etildi.

Ushbu guvohnomalar joriy etilgan dastlabki oylarda 60 mingdan 70 mingtagacha berilgan bo‘lsa, dastlab guvohnomalarning almashtirish muddati 2021-yil 31-dekabrgacha belgilanganligi sababli oxirgi oylarda avtomototransport vositaslarini rasmiylashtirish, qayta rasmiylashtirish bo‘yicha murojaatlar soni keskin ortib, bir oyda berilayotgan guvohnomalarning soni 140 mingtani tashkil etmoqda.

Ta’kidlab o‘tish joizki, O‘zbekiston Respublikasi Vazirlar Mahkamasining 2021-yil 17-noyabrdagi 690-sonli qarori talablariga asosan, guvohnomalarni almashtirish muddati uzaytirildi. Guvohnomalarni almashtirish ishlarini bosqichma-bosqich amalga oshirish belgilandi (birinchi bosqich - 2022-yil 31-martgacha, ikkinchi bosqich - 2022-yil 30-iyungacha, uchinchi bosqich – 2022-yil 30-sentabrgacha, to‘rtinchi bosqich – 2022-yil 31-dekabrgacha).

Shu bilan qatorda, oxirgi oylarda murojaatlarning soni oldingi oylarga nisbatan salkam ikki baravar oshishi oqibatida guvohnomalarni berishda ayrim uzilishlar yuzaga kelmoqda. Mazkur kamchiliklarni bartaraf qilish maqsadida Ichki ishlar vazirligi Yo‘l harakati xavfsizligi bosh boshqarmasi tomonidan guvohnomalar uchun buyurtmalar soni ko‘paytirilib, hududlarga tarqatildi va mazkur uzilishlarga barham berildi.

Yuzaga kelgan noqulayliklar uchun Ichki ishlar vazirligi Yo‘l harakati xavfsizligi bosh boshqarmasi avtomototransport vositalari egalaridan uzr so‘raydi.