2021-yil 23-avgust kuni soat 16:00 larda, Toshkent shahar IIBB YHXB YPX xodimi O.Meliboyev tomonidan Yashnobod tumani, Istiqbol ko‘chasida "Changan" rusumli, 01 С785СВ davlat raqam belgili avtomobil haydovchisi yo‘l belgisiga amal qilmaganligi sabab to‘xtatilgan.

Xodim haydovchiga o‘zini tanishtirgan va tekshiruv davomida haydovchi boshqaruvidagi avtomobil bo‘yicha 60 kun muddatda to‘lanmagan jarima borligi ma’lum bo‘lgan.

YPX xodimi haydovchiga to‘lanmagan jarimasi mavjudligini, yo‘l belgisiga amal qilmaganligi bo‘yicha ogohlantirishini, avtomobilni muddati o‘tgan jarima to‘languniga qadar jarima maydonida vaqtincha ushlab turilishini tushuntirgan.

Haydovchi YPX xodimidan jarima solish to‘g‘risidagi qarorning ijrosi yuzasidan ish yuritish tugaguniga qadar avtomobilni ushlab turish bo‘yicha vakolatli organ rahbarining yozma ko‘rsatmasini ko‘rsatishini so‘ramaganligi bois YPX xodimi ko‘rsatmagan.

Avtomobilni haydovchining o‘zi boshqargan holda yoniga YPX xodimi A.Anorboyev o‘tirib jarima maydonchasiga borishgan.

Ularning ortidan O.Meliboyev ham jarima maydoniga yetib kelgan. Jarima maydonida avtomobilni qabul qilib oluvchi mas’ul shaxs, YPX xodimi va haydovchi ishtirokida tegishli hujjat to‘ldirilib imzolangan.