Oʻzbekiston Respublikasi Vazirlar Mahkamasining 2017-yil 31-avgustdagi 683-son “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida”gi qarori bilan roʻyxatdan oʻtkazish davlat raqami belgilarini avtomototransport vositalariga rasmiylashtirib berish tartibi belgilangan.

Mazkur qarorning 1-ilovasi 31-bandiga koʻra, oldin berilgan (ilgari foydalanishda boʻlgan) roʻyxatdan oʻtkazish davlat raqami belgilari avtotransport vositasining avvalgi egasi tomonidan saqlanmaganda, ular keyinchalik davlat roʻyxatidan oʻtkazilganda avtotransport vositasi yangi egasining arizasiga asosan oʻsha avtotransport vositasiga rasmiylashtirilishi mumkin.

Agarda davlat raqam belgisi avvalgi egasi tomonidan saqlanmaganda, davlat raqami belgisi belgilangan tartibda hududiy YHXB Roʻyxatlash va imtihon olish boʻlinmalari tomonidan kirim qilinib, komissiya ishtirokida foydalanishga yaroqli deb topilganlari qayta rasmiylashtirish uchun olib qoʻyiladi, foydalanishga yaroqsiz deb topilganlari belgilangan tartibda qirqish yoʻli bilan yoʻq qilinadi.

Oldin berilgan (ilgari foydalanishda boʻlgan) ROʻDRBlar takroran berilganda oshirilgan toʻlov stavkasi toʻlovi nazarda tutilmagan holda ROʻDRBni berish uchun toʻlov stavkasining 50 foizi (bugungi kunda 225 ming soʻm) miqdorida toʻlov summasi belgilanadi.

Maʼlumot uchun: roʻyxatdan oʻtkazish davlat raqami belgisi uchun toʻlov summasi bazaviy hisoblash miqdorining 1,5 baravarini (450 ming soʻmni) tashkil etadi. Bugungi kunda bazaviy hisoblash miqdori 300 ming soʻmni tashkil qilmoqda.

Shuningdek, mazkur qarorga asosan bitta partiya (999 juft) roʻyxatdan oʻtkazish davlat raqami belgilaridan 328 tasi auksion savdolariga qoʻyilishi va 671 tasi DYHXX tomonidan rasmiylashtirib berilishi belgilangan. Jumladan, 01*715** roʻyxatdan oʻtkazish davlat raqami belgisi auksion savdolariga qoʻyilmasdan toʻgʻridan-toʻgʻri DYHXX tomonidan rasmiylashtirib beriladi.

Roʻyxatdan oʻtkazish davlat raqami belgilarini avtotransport vositasi egasi tomonidan boshqa shaxsga sotish normativ-huquqiy hujjatlarda koʻrsatilmagan.

Bundan tashqari Oʻzbekiston Respublikasi Vazirlar Mahkamasining 2017-yil 31-avgustdagi 683-son qarorining 3-bandida jismoniy va yuridik shaxslarga avtotransport vositalari uchun xaridorgir harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini oshirilgan toʻlov stavkalari boʻyicha berish stavkalari Oʻzbekiston Respublikasining Respublika byudjetiga toʻliq hajmda oʻtkaziladigan, bazaviy hisoblash miqdorining bir yuz ellik baravari (45 mln. soʻm) miqdorida belgilangan.

Shunga asosan, fuqarolar tomonidan mazkur qarorga muvofiq buyurtma asosida belgilangan roʻyxatdan oʻtkazish davlat raqami belgilarini hududiy YHXBlarga murojaat qilish orqali olish mumkinligini maʼlum qilamiz.

Maʼlumot uchun: Mazkur qarorda buyurtma asosida harflari bir xil boʻlgan 4-6-toifaga kiruvchi davlat raqami belgilari nazarda tutilgan.