Joriy yilning 16-aprel kuni Fargʻona viloyati, Uchkoʻprik tumani dehqon bozori yaqinida YPX xodimi A.Oʻrinov meʼyoriy hujjatlarini tekshirish maqsadida “Matiz” rusumli avtomobil haydovchisini toʻxtatgan. Oʻzaro muloqot jarayonida YPX xodimi haydovchining kiyimiga eʼtiroz bildirib, Yoʻl harakati qoidalari kitobining 55-56 sahifalarida haydovchi kiyim kiyish madaniyatiga rioya qilishi boʻyicha band belgilanganligini taʼkidlab, maʼmuriy bayonnoma rasmiylashtirishi mumkinligini ham keltirib oʻtgan. Ushbu muloqot aks etgan video ijtimoiy tarmoqlarda tarqalib, keng jamoatchilik muhokamalariga sabab boʻlmoqda.

Amaldagi Yoʻl harakti qoidalarida haydovchi transport vositasidan foydalanish va uni boshqarish vaqtida kiyim kiyish tartibi toʻgʻrisida hech qanday izoh yoki tartib belgilanmaganligi hamda Maʼmuriy javobgarlik toʻgʻrisidagi Kodeksda ham yuqoridagi holat boʻyicha hech qanday jazo choralari mavjud emasligini, shuningdek, haydovchiga notoʻgʻri va asossiz maʼlumot yetkazgan YPX xodimi A.Oʻrinovga nisbatan xizmat tekshiruvi tayinlanganligini maʼlum qilamiz.