Joriy yilning 14-sentabr kuni soat 10:10 larda Jizzax viloyati, Jizzax shahar, Islom Karimov shoh ko‘chasida YPX xodimi A.To‘raqulov "Lacetti" rusumli xizmat avtomobilida harakatlanayotib, yo‘lda guruh-guruh bo‘lib, boshqa yo‘l harakati qatnashchilarining erkin harakatiga xalaqit berib ketayotgan avtomobillarni ko‘rgan va oldindagi chorrahada xizmat olib borayotgan xodimga aloqa vositasi orqali xabar bergan.

Transport vositalari serqatnovligi sabab mazkur guruh bo‘lib ketayotgan avtomobillarni barchasini to‘xtatish imkoniyati bo‘lmagan va YPX xodimi B.Razzoqov tomonidan ushbu guruhdagi "JAC SUNRAY" rusumli mikroavtobus to‘xtatilgan. O‘zaro muloqot vaqtida haydovchi guruhga qo‘shilmaganligini ta’kidlagan. YPX xodimi tomonidan tushuntirishlar berilib, haydovchi ogohlantirilgan.

Mazkur hududga yaqin joyda bo‘lgan Jizzax viloyati IIB YHXB boshlig‘i X.Xolqo‘ziyev kelib, turli tadbirlar hamda to‘y marosimlarida harakatlanuvchi haydovchilar orasida guruh-guruh bo‘lib harakatlanmaslik, yo‘l harakati qatnashchilarining erkin va xavfsiz harakatiga xalaqit bermaslik borasida targ‘ibot va tushuntirish ishlari olib borilib, haydovchilar ogohlantirilgan.

Barcha haydovchilardan har qanday tadbir va marosimlar vaqtida qoidalarga, tezlik me’yoriga rioya qilishlarini, guruh-guruh bo‘lib harakatlanmasliklarini so‘raymiz.