Joriy yilning 14-sentabr kuni, Toshkent shahar, Yangi hayot tumani, Qipchoq-Qo‘rg‘ontepa ko‘chalari kesishgan chorrahaga xizmatga jalb etilgan YPX xodimi Sh.O‘rmonov fuqaro, 1993-yilda tug‘ilgan A.K. bilan o‘zaro muloqot qilgan.

Fuqaro A.K. mazkur muloqotni telefon orqali tasvirga olishni boshlagan vaqtda yo‘lning qatnov qismida piyoda sifatida telefondan foydalanganligi uchun unga nisbatan YPX xodimi tomonidan Yo‘l harakati qoidalarining 19-bandiga rioya qilmaganligi bo‘yicha ma`muriy bayonnoma rasmiylashtirilgan.

Videoda YPX xodimi fuqaroga "siz" deb murojaat qilganligi, fuqaro xodimga nisbatan "sen" deya, nosamimiy munosabatda bo‘lganligi, shundan so‘ng YPX xodimi bir necha bor ogohlantirishiga qaramasdan fuqaro A.K. qo‘pol muomalada bo‘lishda davom etganligi, xodim og‘ir vazmin bo‘lmasdan fuqaroga "sen" deb gapirishni boshlaganligi aks etgan. YPX xodimi kelgusida yo‘l harakati qatnashchilari bilan og‘ir va vazmin bo‘lib, hurmat bilan munosabatda bo‘lishi yuzasidan ogohlantirildi.

O‘z navbatida, ayrim yo‘l harakati qatnashchilaridan nosamimiy, qo‘pol munosabatda bo‘lib, YPX xodimi bilan tortishuvli vaziyatni yuzaga keltirmasliklarini so‘raymiz.