O‘zbekiston Respublikasi Vazirlar Mahkamasining 2017-yil 31-avgustdagi 683-son qarorining 1-ilovasi "Avtomototransport vositalarini davlat ro‘yxatidan o‘tkazish tartibi to‘g‘risida Nizom"ning 29-bandiga ko‘ra, "Avtotransport vositasini boshqa shaxsga o‘tkazishda oldin berilgan (ilgari foydalanishda bo‘lgan) oshirilgan to‘lov stavkalari bo‘yicha avtotransport vositalari uchun ro‘yxatdan o‘tkazish davlat raqami belgisi va xaridorgir harf va raqamlar kombinatsiyasiga ega bo‘lgan oshirilgan to‘lov stavkasi bo‘yicha avtotransport vositalari uchun ro‘yxatdan o‘tkazish davlat raqami belgisi transport vositasining avvalgi egasining arizasiga ko‘ra hududiy YHXDX organiga o‘n ikki oy muddatga saqlash uchun topshirilishi mumkin. Ro‘yxatdan o‘tkazish davlat raqami belgisini saqlaganlik uchun to‘lov undirilmaydi." - deya ko‘rsatilgan. Shuningdek, 31-bandining to‘rtinchi xatboshisiga ko‘ra, "Oldin berilgan (ilgari foydalanishda bo‘lgan) ro‘yxatdan o‘tkazish davlat raqami belgilari, shu jumladan xaridorgir harf va raqamlar kombinatsiyasiga ega bo‘lgan oshirilgan to‘lov stavkasi bo‘yicha avtotransport vositalari uchun, ular avtotransport vositalari egalari tomonidan saqlanmagan holatlarda hududiy YHXDX organlari tomonidan olib qo‘yiladi va belgilangan tartibda yo‘q qilinadi." - deya ko‘rsatilgan.

Videoda keltirilgan murojaat o‘rganilib, fuqaro M. N. ga tegishli bo‘lgan "Damas" rusumli avtomobilning 50 Z111NA davlat raqam belgisi yuqorida keltirilgan qaror talablari asosida saqlash uchun ariza berilmaganligi sababli 01.06.2021 yilda belgilangan tartibda Toshkent shahar IIBB YHXB RO‘ va IOB tomonidan yo‘q qilinganligi ma’lum bo‘ldi.