2020-yil 11-yanvar kuni soat 13:20larda Toshkent shahar, Yunusobod tumani, Navoiy koʻchasida 3.27 — “Toʻxtash taqiqlangan” yoʻl belgisining taʼsir doirasida toʻxtagan “OOO FAVORIT MAX GROUP” MCHJga tegishli boʻlgan “Spark” rusumli, 01709RFA davlat raqam belgili avtomobil haydovchisi, 1987-yilda tugʻilgan Sh.Sh.ga nisbatan YPX xodimi Sh.Patxullayev tomonidan belgilangan tartibda UZ-19 seriyali 01-679122 raqamli maʼmuriy bayonnoma rasmiylashtirilgan. Ushbu bayonnoma asosida Oʻzbekiston Respublikasi Maʼmuriy javobgarlik toʻgʻrisidagi Kodeksning 128-6-moddasi 1-qismi tartibida jarima qoʻllash toʻgʻrisidagi qaror chiqarilgan.

Fuqaro Sh.Sh. chiqarilgan qaror yuzasidan eʼtiroz bildirib, Yashnobod tumani Maʼmuriy sudiga ariza bilan murojaat qilgan. Ariza boʻyicha, 2020-yil 18-mart kuni toʻplangan hujjatlar Yashnobod tumani Maʼmuriy sudi tomonidan koʻrib chiqilib, fuqaro Sh.Sh. Oʻzbekiston Respublikasi MJtKning 128-6-moddasi 1-qismida koʻrsatilgan huquqbuzarlikni sodir etgan deb topilib, UZ-19 seriyali 01-679122 raqamli maʼmuriy bayonnoma asosida chiqarilgan maʼmuriy jazo qoʻllash toʻgʻrisidagi qaror oʻzgarishsiz qoldirilgan va undirish choralarini koʻrish maqsadida hududiy Majburiy ijro byurosiga yuborilgan. Mazkur jarima MIB tomonidan undirilgan. Texnik sabablarga koʻra, mazkur maʼmuriy jazo qoʻllash toʻgʻrisidagi qaror boʻyicha belgilangan jarima undirilganligi haqidagi maʼlumot IIV JXD YHXXning tizimiga kelib tushmagan.

2020-yil 6-may kuni 01709RFA davlat raqam belgisi “OOO FAVORIT MAX GROUP” MCHJga tegishli boʻlgan “Lacetti” rusumli avtomobilga rasmiylashtirilgan. Ijtimoiy tarmoqda mazkur avtomobil haydovchisi tomonidan bildirilgan eʼtirozlar oʻrganilib, yuqorida keltirib oʻtilganlar asosida, belgilangan jarima MIB tomonidan undirilganligi boʻyicha IIV JXD YHXX tizimiga tegishli maʼlumotlar kiritildi.