O‘zbekiston Respublikasi Vazirlar Mahkamasining 2020-yil 29-dekabr kunidagi "Avtotransport vositalarini yollash va ijaraga berish faoliyatini qo‘llab-quvvatlash, elektromobillar va mototransportlardan foydalanish, shuningdek, velosipedda mamlakat bo‘ylab harakatlanishni rivojlantirishga oid qo‘shimcha chora-tadbirlar to‘g‘risida"gi 812-son qarori asosida tadbirkorlik faoliyati bilan shug‘ullanuvchi yuridik shaxslar tomonidan 2021-yil 7-oktabr kuni IIV Yo‘l harakati xavfsizligi bosh boshqarmasiga kiritilgan so‘rovnomalari yuzasidan o‘rnatilgan tartibda javob xati berilgan.

Yuridik shaxslarning faoliyatlarini yuritish davomida YHXB xodimlari bilan kelib chiqayotgan tushunmovchiliklarni bartaraf etish va tadbirkorlarga yaqindan ko‘mak berish maqsadida joriy yilning 3-noyabr kuni IIV YHXBB boshlig‘i tomonidan tadbirkorlar bilan o‘tkazilgan uchrashuvda, O‘zbekiston Respublikasi Adliya Vazirligidan O‘zbekiston Respublikasi MJtKning 171-moddasi qo‘llanilishi yuzasidan sharh olishga kelishilib, bu bo‘yicha yig‘ilish bayoni tuzildi hamda tadbirkorlarga yig‘ilish bayon nusxasi taqdim etildi. 2021-yilning 3-noyabr kuni O‘zbekiston Respublikasi Adliya Vazirligiga MJtKning 171-moddasiga sharh berish yuzasidan xat kiritilib, 9-noyabr kuni 3/20-2/2196-son javob xati olindi va ushbu xat bo‘yicha tadbirkorlar bosh boshqarmaga taklif etilib, tanishtirildi.

2021-yil 1-noyabr kuni “FARZONA FAVORIT SERVIS” MCHJga yurist lavozimiga ishga qabul qilingan, internet ijtimoiy tarmoqlarida “Otabek777” nomi bilan tanilgan Mashrapov Otabek Xojiakbar o‘g‘li joriy yilning 13-noyabr kuni IIV YHXBB boshlig‘i qabulida bo‘lib, Adliya vazirligi tomonidan berilgan xatga o‘zining e’tirozlari borligini bildirganidan so‘ng bosh boshqarma raxbari tadbirkorlar bilan bo‘layotgan tushunmovchiliklar xozirda o‘rganilayotganligi tegishli idoralar bilan hamkorlikda ishlar olib borilayotganligi, yakuniy hulosasi bo‘yicha yana bir bor uchrashuv tashkil etilishini, murojaati «Jismoniy va yuridik shaxslarning murojaatlari to‘g‘risida»gi O‘zbekiston Respublikasi qonunining 28-moddasiga asosan 15 kunlik muddat ichida ko‘rib chiqilishi hamda murojaati ko‘rib chiqilmasidan avval bir tomonlama xulosa qilinib ijtimoiy tarmoqlarga yakunlanmagan va asoslantirilmagan ma’lumotlar chiqarmasligi yuzasidan tushunchalar berilgan.

Tadbirkorlarning murojaati bosh boshqarma rahbariyati tomonidan nazoratga olingan. Qabul qilingan qaror yuzasidan tomonlar taklif etilib e’lon qilinadi.

O‘zbekiston Respublikasi IIV YHXBB Axborot xizmati