Ijtimoiy tarmoqda “Qachondan beri haydovchi sodir etmagan qoidabuzarligi uchun badal toʻlashi kerak?” sarlavhasi ostida tarqalgan video yuzasidan maʼlumot

Transport vositalarini qisqa muddatga shartnoma asosida yuridik va jismoniy shaxslarga ijaraga berish faoliyati bilan shugʻullanuvchi yuridik shaxslarga tegishli transport vositalarini shartnoma asosida boshqarayotgan shaxs tomonidan foydalanish davomida yoʻl harakati qoidabuzarligi holati Ichki ishlar vazirligi Yoʻl harakati xavfsizligi xizmati tomonidan aniqlanib, transport vositasi Oʻzbekiston Respublikasi MJtKning 291-moddasi 1-qismiga asosan vaqtinchalik jarima maydoniga joylashtirilgan taqdirda qoidabuzarlik yuzasidan maʼmuriy ish vakolatli organlar tomonidan koʻrib chiqilganidan soʻng yuridik shaxsning transport vositasidan foydalanish uchun masʼul boʻlgan xodimi yoki yoʻl harakati qoidabuzarligi sodir etilgan vaqtda yuridik shaxsga tegishli transport vositasini boshqargan haydovchi toʻgʻrisidagi toʻliq maʼlumotlarni (pasport nusʼhasi, yashash manzili, haydovchilik guvohnomasining nusʼhasi, INN, haydovchining tilxati, ishonchnoma yoki yoʻl varaqasi, mavjud hollarda ijara shartnomasi, transport vositasining topshirish vaqtida haydovchi tibbiy koʻrikdan oʻtkanligi yuzasidan tibbiy maʼlumotnoma, tushuntirish xati va boshqa hujjatlarni ilova etgan holda) maʼmuriy ishni koʻrib chiqqan davlat organiga rasmiy xat orqali taqdim etilganidan soʻng yuridik shaxsga tegishli transport vositasini jarima maydonidan olib chiqish uchun ruhsat beriladi.

Oʻzbekiston Respublikasi MJtKning 291-moddasi 3-qismida “Yoʻl harakati qoidalarini buzganlik uchun jarima solish haqida qaror chiqarilgan kundan eʼtiboran oltmish kun ichida jarima toʻlanmagan taqdirda, transport vositasi jarima solish toʻgʻrisida qaror chiqargan vakolatli organ rahbarining yozma koʻrsatmasiga binoan jarima solish toʻgʻrisidagi qarorning ijrosi yuzasidan ish yuritish tugaguniga qadar ushlab turiladi” deb koʻrsatib oʻtilganligi sababli, oʻrnatilgan muddatlarda qarzdorligi bartaraf etilmagan transport vositalari aniqlangan taqdirda transport vositasi jarima maydoniga joylashtirilishini maʼlum qilamiz.

Shuningdek, Yoʻl harakati xavfsizligi xizmati faoliyatida mavjud boʻlgan 11 ta tarqoq axborot tizimlarini yagona platformaga birlashtirish va yagona tezkor boshqaruvni yoʻlga qoʻyish maqsadida Yoʻl harakati xavfsizligi xizmati tomonidan joriy yilning 5-sentabridan yagona avtomatlashtirilgan axborot tizimi joriy etildi.

Mazkur tizimning joriy etilishi kelgusida Yoʻl harakati xavfsizligi xizmatida mavjud anʼanaviy tarzda koʻrsatiladigan davlat xizmatlari tizimlarini takomillashtirishga, axborot texnologiyalari boʻyicha yagona siyosatni olib borish va toʻliq raqamlashtirishga, axborotlar xavfsizligini taʼminlashga, tizimlarning uzluksiz ishlashiga, maʼlumotlarning aktualligiga, server qurilmalarini nazorat qilishga, oʻquv va imtihon olish jarayonini nazorat qilishga, avtomobil yoʻllarida harakatni toʻgʻri tashkil etishga, sodir etilgan yoʻl-transport hodisalari toʻgʻrisidagi maʼlumotlarni zudlik bilan olishga, tezkor boshqaruvni amalga oshirishga, shuningdek, inson omilini cheklagan holda yoʻl harakati qoidabuzarliklarini aniqlashga xizmat qiladi.

Shuni alohida takidlash lozimki, dastlabki bosqichda Yagona tizimning asosiy (“Haydovchilik guvohnomasi hisobi”, “Avtotransport hisobi” va “Kadrlar hisobi”) modullari yaratilgan boʻlib, xozirda “Maʼmuriy amaliyot” modulini ishga tushirish boʻyicha texnik ishlar amalga oshirilmoqda. Ushbu modul doirasida, “karshering” tashkilotlaridan avtomototransport vositalarini ijaraga olgan shaxslar tomonidan yoʻl harakati qoidalari buzilganligi toʻgʻrisidagi maʼlumotlarning mavjudligini aniqlash maqsadida karshering tashkilotlariga Yoʻl harakati xavfsizligi xizmatining “Maʼmuriy amaliyot” avtomatlashtirilgan axborot tizimiga kirish va yoʻl harakati qoidalari buzilganligi toʻgʻrisidagi maʼlumotlarni tizimga tezkorlik bilan kiritish imkoniyati taqdim etilishini maʼlum qilamiz.