2022-yil 26-aprel kuni Qashqadaryo viloyati, Chiroqchi tumani, Xonjon koʻchasida taʼmirlash ishlari olib borilayotganligi sababli, transport vositalarining harakati tuman dehqon bozori oldidan tashkil etilganligi bois, bozor atrofida transportlar serqatnovligi ortgan. Shuningdek, ushbu bozor oldida oʻrnatilgan 3.27 “Toʻxtash taqiqlangan” yoʻl belgisiga rioya qilmasdan, belgining taʼsir doirasida toʻxtab turgan avtomobillar sabab tirbandlik yuzaga kelgan. Ushbu hududda xizmat olib borgan YPX xodimlari qoidani buzib toʻxtab turgan avtomobillarni planshet moslamasi orqali suratga olib, oʻz xizmat vazifasini bajarayotgan vaqtda qoidani buzgan holda toʻxtab turgan avtomobillarning haydovchilari YPX xodimlariga eʼtiroz bildirib, turli nooʻrin soʻzlar bilan ziddiyatli vaziyatni yuzaga keltirgan. Atrofdagi boshqa fuqarolar ham toʻplanib vaziyat yanada jiddiylashgan. Faol qarshilik koʻrsatgan fuqarolardan biri janjalli vaziyatdan foydalanib, YPX xodimi B.Karimovning bodikamerasi va koʻkrak nishon belgisini yulib olgan.

Voqea joyi Chiroqchi tumani prokuraturasi xodimlari tomonidan oʻrganilib, holat boʻyicha Oʻzbekiston Respublikasi Jinoyat Kodeksining 219-moddasi 2-qismi bilan jinoyat ishi qoʻzgʻatildi. Fuqarolar Sh.B., N.B., N.D. va Q.A.lar gumonlanuvchi sifatida jalb etilib, ushbu fuqarolarning 3 nafari Jinoyat Protsessual Kodeksining 221-moddasi tartibida ushlandi.