Ijtimoiy tarmoqda “Nexia” rusumli avtomobilning davlat raqam belgisini koʻrish imkoniyatini cheklaydigan, ularni anglashga toʻsqinlik qiladigan turli ashyolar yopishtirilganligi aks etgan surat va uning ostida izohlar keltirilgan xabar tarqaldi.

Ushbu xabar yuzasidan Toshkent viloyati IIBB YHXB xodimlari tomonidan surishtiruv olib borilib, “Nexia” rusumli, 40R060FA davlat raqam belgili avtomobil haydovchisi, 1994-yilda tugʻilgan U.M.ga nisbatan Yoʻl harakati qoidalarining 3-ilovasi (Transport vositalaridan foydalanishni taqiqlovchi shartlar) 7.15-bandi (Transport vositasida roʻyxatdan oʻtkazish davlat raqami belgilarini koʻrinishini cheklaydigan, toʻgʻri aniqlanishiga xalaqit beradigan har-xil buyumlar oʻrnatilgan va qoplamalar bilan qoplangan boʻlsa) talabini buzganligi boʻyicha Oʻzbekiston Respublikasi Maʼmuriy Javobgarlik toʻgʻrisidagi Kodeksning 127-moddasi 2-qismi (Davlat raqam belgilarini koʻrish imkoniyatini cheklaydigan, ularni anglashga toʻsqinlik qiladigan turli ashyolar oʻrnatish va qoplama surtish) tartibida bayonnoma tuzilib, avtomobil vaqtincha saqlash uchun jarima maydoniga qoʻyildi.

Barcha haydovchilardan qoidalarga rioya qilishlarini soʻraymiz.

Radar va kameralardan yashirinish maqsadida avtomobilning davlat raqam belgisini yopgan holda, shoshilib harakatlanish ogʻir oqibatlarga sabab boʻlishi mumkinligini unutmang.