2022-yil 4-mart kuni soat 23:00 larda, Toshkent shahar, Yakkasaroy tumani, KXAY koʻchasida, 1995-yilda tugʻilgan, YPX xodimi A.R. “Lacetti” rusumli, 01512VSC davlat raqam belgili maxsus xizmat avtomobilida toʻxtash ishorasiga boʻysunmagan “Spark” rusumli transport vositasi haydovchisini ortidan kuzatib ketayotgan vaqtda, maxsus tovush chiqaruvchi qurilmadan foydalangan holda svetoforning taqiqlovchi qizil chirogʻida harakatlangan. Lekin, haydovchi qoidalarning 25-bandida belgilangan talabga rioya qilmagan. Yaʼni, tovush chiqaruvchi qurilma bilan birgalikda yorituvchi mayoqchalarni yoqmagan hamda unga yoʻl berilayotganligiga ishonch xosil qilmasdan harakatlangan va svetoforning yashil chirogʻida harakatlanib kelayotgan, 1995-yilda tugʻilgan M.M. boshqaruvida boʻlgan “Lacetti” rusumli avtomobil bilan toʻqnashgan. Toʻqnashuv oqibatida haydovchi M.M. boshqaruvidagi “Lacetti” avtomobili agʻdarilgan.

YTH natijasida, haydovchi M.M. boshqaruvidagi “Lacetti” rusumli avtomobil yoʻlovchisi, 1997-yilda tugʻilgan F.A. tan jarohati bilan shifoxonaga olib ketilgan.

Mazkur YTH yuzasidan Yakkasaroy tuman prokuraturasi tomonidan surishtiruv harakatlari olib borilmoqda.

Barcha haydovchilardan yoʻllarda qoidalarga rioya qilishni soʻraymiz.