2022-yil 25-yanvar kuni soat 15:00 larda Qoʻngʻirot tumani, Ipak yoʻli koʻchasida koʻrinishidan voyaga yetmagan bola yoʻl harakati xavfsizligi boshqarmasiga tegishli boʻlgan, toʻxtab turgan “Lacetti” rusumli, 95545VSF davlat raqam belgili maxsus xizmat avtomobilining ustiga chiqqan va uning mazkur xatti-harakatlari doʻsti tomonidan tasvirga olingan. Videotasvir ijtimoiy tarmoqda tarqatilgan.

Holat yuzasidan surishtiruv olib borilganda, mazkur huquqbuzarlikni voyaga yetmagan, 2005-yilda tugʻilgan B.T. sodir qilganligi maʼlum boʻldi. Hududiy profilaktika inspektori tomonidan toʻplangan hujjatlar voyaga yetmaganlar ishlari boʻyicha tuman idoralararo komissiyasi tomonidan oʻrganilib, ushbu voyaga yetmagan bolaning otasi J.T.ga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 47-moddasi (bolalarni tarbiyalash va ularga taʼlim berish borasidagi majburiyatlarni bajarmaslik) birinchi qismi tartibida BHMning bir baravari miqdorida jarima jazosi belgilangan.

Barcha ota-onalardan oʻz farzandlariga eʼtiborli boʻlishlarini, tartib va qoidalar haqida doimiy ravishda tushuntirishlar berib borishlarini soʻraymiz.