2022-yil 23-aprel kuni soat 09:40 larda Toshkent viloyati, Angren shahri, Amir Temur koʻchasida xizmat olib borgan YPX xodimi X.Rahmonov tomonidan meʼyoriy hujjatlarini tekshirish maqsadida “Matiz” rusumli avtomobil haydovchisi toʻxtatilgan. Tekshiruv davomida haydovchida haydovchilik guvohnomasi va ushbu avtomobildan foydalanish uchun ishonchnoma yoʻqligi maʼlum boʻlgan. Qoidabuzarlik holati YPX xodimi tomonidan tegishli tartibda rasmiylashtirilayotgan vaqtda, haydovchi, 1998-yilda tugʻilgan S.N. unga nisbatan qonunuiy chora koʻrilishini payqagach xodimga qarshilik koʻrsata boshlagan. YPX xodimi yaqin atrofda boʻlgan hamkasblaridan amaliy yordam soʻragan. Voqea joyiga oʻzini haydovchining akasi, “Sardor” deya tanishtirgan fuqaro ham yetib kelib, xodimlarga faol qarshilik koʻrsatib, ziddiyatli vaziyatni yuzaga keltirgan. YPX xodimi tomonidan holat boʻyicha Oʻzbekiston Respublikasi Maʼmuriy javobgarlik toʻgʻrisidagi Kodeksning 135-, 194- hamda 195-moddalari tartibida bayonnoma rasmiylashtirilgan va ushbu fuqarolar Angren shahar IIBga topshirilgan. “Matiz” rusumli avtomobil vaqtincha saqlash uchun jarima maydoniga qoʻyilgan. Shuningdek, hozirda ushbu holat boʻyicha Angren shahar prokuraturasi xodimlari tomonidan surishtiruv olib borilmoqda.

Barcha haydovchilardan avvalo qoidalarga rioya qilishni, qoidani chetlab oʻtgan vaqtda esa, YPX xodimi oʻz xizmat vazifasini bajarishiga qarshilik koʻrsatmaslikni soʻraymiz.