Joriy yilning 11-avgust kuni soat 10:30 larda, Toshkent shahar, Mirzo Ulug‘bek tumani, T.Malik hamda Do‘rmon yo‘li ko‘chalari chorrahasida YPX xodimlari X.Saydazimov va K.Eshboyevlar tomonidan "Cobalt" rusumli avtomobil haydovchisi 1.1 yo‘l yotiq chizig‘ini bosib harakatlanganligi bois to‘xtatilgan. Haydovchiga nisbatan bayonnoma tuzilgan. Haydovchi YPX xodimlaridan dislokatsiya ko‘chirmasini ko‘rsatishni so‘ragan vaqtda YPX xodimlari maxsus tadbirga biriktirilganliklarini, navbatchilik qismidan so‘rab bilishi mumkinligini haydovchiga tushuntirishgan.

Ma’lumot o‘rnida, O‘zbekiston Respublikasi Vazirlar Mahkamasining 2018-yil 1-dekabrda 975-son qarori bilan tasdiqlangan "Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida Nizom"ning 11-bandiga ko‘ra, "Yo‘l harakati qatnashchisi maxsus tadbirlarni haqiqatda tasdiqlangan reja asosida o‘tkazilayotganligi haqida markaziy axborot-dispetcherlik xizmati — axborot-dispetcherlik xizmatiga telefon qilish yoki ushbu xodim xizmat olib borayotgan DYHXX saf bo‘limi (bo‘linmasi) boshlig‘iga murojaat qilish orqali ma’lumot olishi mumkin. Bunda YPX xodimi yo‘l harakati qatnashchisining talabiga ko‘ra, MADX — ADXning telefon raqami haqida ma’lumot beradi. Yo‘l harakati qatnashchisiga maxsus tadbirlarning o‘tkazilish maqsadi, transport vositasini to‘xtatgan YPX xodimi maxsus tadbirda ishtirok etgan yoki etmaganligi, transport vositasi to‘xtatilgan hududda maxsus tadbir o‘tkazilganligi haqida ma’lumot beriladi. Maxsus tadbirning shartli nomlanishi, to‘liq mohiyati hamda ko‘lami haqida ma’lumot, shuningdek, maxsus tadbirning o‘tkazilishiga asos bo‘lgan hujjatlar ko‘rsatilmaydi, ulardan nusxalar berilmaydi." - deya belgilangan.