Ijtimoiy tarmoqda “Mercedes-Benz” rusumli 60505VSF davlat raqam belgili maxsus xizmat avtomobili boʻyicha oʻz muddatida bartaraf qilinmagan 6 ta qarzdorlik holatlari keltirilgan xabar tarqaldi.

Xabar yuzasidan Andijon viloyati IIB JXX YHXB masʼul xodimlari tomonidan surishtiruv oʻtkazildi. Belgilangan jarimalar boʻyicha viloyat IIB JXX YHXB navbatchilik qismining qayd etish kitobi bilan solishtiruvlarga koʻra, kechiktirib boʻlmas vazifalarni bajarish, kuzatuv ishlarini amalga oshirish jarayonida qayd etilganligi maʼlum boʻldi.

Oʻzbekiston Respublikasi Maʼmuriy javobgarlik toʻgʻrisidagi Kodeksning 17¹ moddasining beshinchi xatboshisi (Tezkor va maxsus xizmatlarning transport vositalari, shuningdek ular kuzatib kelayotgan transport vositalari tomonidan yoʻl harakati qoidalariga muvofiq imtiyozdan foydalangan holda sodir etilgan maʼmuriy huquqbuzarliklar maxsus foto- va video qayd etishning avtomatlashtirilgan texnik vositalari orqali qayd etilgan taqdirda hamda kechiktirib boʻlmaydigan xizmat vazifalarini bajarganlikni tasdiqlovchi hujjatlar taqdim etilganda haydovchilarning maʼmuriy qoidabuzarligi oxirgi zarurat holatlarida sodir etilgan deb topiladi va maʼmuriy ish ushbu Kodeksning 271-moddasiga muvofiq tugatiladi) hamda 271-moddasi birinchi xatboshisining toʻrtinchi kichik bandiga muvofiq mazkur 6 ta qoidabuzarlik boʻyicha qarorlar bekor qilindi.

Ushbu keltirib oʻtilgan “Mercedes-Benz” rusumli 60505VSF davlat raqam belgili avtomobil maxsus transport vositasi ekanligi, tezkor, kechiktirib boʻlmas vaziyatlarda yoʻl harakati xavfsizligini taʼminlash sharti bilan Qoidalarning 7-bobi (tartibga soluvchining ishoralaridan tashqari), 9 — 16, 19-20 va 22-boblari, 1- va 2-ilovalari talablaridan chetga chiqishlariga ruxsat berilishini inobatga olish maqsadga muvofiqdir.