2022-yil 23-mart kuni soat 01:20 larda, Nukus shahar, A.Doʻstnazarov koʻchasida “Lacetti” rusumli avtomobil haydovchisi YPX xodimining toʻxtash ishorasiga boʻysunmasdan harakatlangan. Harakati davomida svetoforning qizil chirogʻida oʻtgan va Beruniy koʻchasida qarama-qarshi harakatlanish uchun moʻljallangan tomonga chiqib, avariya holatini yuzaga keltirishi mumkin boʻlgan qoidabuzarliklar sodir etgan. Ushbu jarayonlar avtomobil salonida boʻlgan yoʻlovchi tomonidan tasvirga olingan va ijtimoiy tarmoqda tarqatilgan.

Mazkur holat yuzasidan surishtiruv olib borilib, qoidalarni qoʻpol tarzda chetlab oʻtgan haydovchi 2001-yilda tugʻilgan, Toshkent shahar, Chilonzor tumanida yashovchi S.S. ekanligi maʼlum boʻldi. Unga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 128⁴, 128⁵ hamda 194-moddasi tartibida maʼmuriy bayonnoma tuzilib, “Lacetti” rusumli avtomobil ushbu Kodeksning 291-moddasi tartibida vaqtincha saqlash uchun jarima maydoniga qoʻyildi.

Barcha haydovchilardan qoidalarga, tartibga soluvchilarning ishoralariga qatʼiy rioya qilishlarini soʻraymiz. Yoʻl oʻyin maydoni emasligini unutmang!