Ijtimoiy tarmoqda fuqaroning YPX xodimi tomonidan majburiy texnik koʻrik boʻyicha rasmiylashtirilgan bayonnomaga eʼtirozlari mavjudligi, transport vositasi belgilangan tartibda majburiy texnik koʻrikdan oʻtkazilganligi aytilgan video tarqaldi.

2021-yil 14-noyabr kuni YPX xodimi I.Mambetov tomonidan “Mercedes-Benz Vito” rusumli, 01M207EB davlat raqam belgili avtomobil haydovchisi, 1999-yilda tugʻilgan Sh.A.ga nisbatan transport vositasi majburiy texnik koʻrikdan oʻtkazilmaganligi boʻyicha bayonnoma rasmiylashtirilganligi holati yuzasidan xizmat tekshiruvi oʻtkazilayotganligi haqida xabar berilgan edi.

Tekshiruv xulosasiga koʻra, xizmati mobaynida transport vositasi texnik koʻrikdan oʻtganligi holatiga toʻliq oydinlik kiritmasdan haydovchiga nisbatan maʼmuriy bayonnoma rasmiylashtirgani, Oʻzbekiston Respublikasi Vazirlar Mahkamasining 2018-yil 1-dekabrdagi 975-son qarori bilan tasdiqlangan “Yoʻl-patrul xizmati xodimlarining yoʻl harakati qatnashchilari bilan oʻzaro munosabatlari hamda maxsus moslamalardan foydalanishi tartibi toʻgʻrisida”gi Nizom hamda Ichki ishlar vazirining meʼyoriy buyrugʻi talablarini buzganligi uchun Toshkent shahar IIBB JXX YHXB YPX xodimi I.Mambetovga nisbatan “Hayfsan” intizomiy jazosi qoʻllanilishi, haydovchi Sh.A.ga nisbatan rasmiylashtirilgan bayonnoma Oʻzbekiston Respublikasi Maʼmuriy javobgarlik toʻgʻrisidagi Kodeksning 271-moddasi 1-qismi (maʼmuriy huquqbuzarlik alomati yoʻq)ga asosan bekor qilinishi belgilandi.

Shuningdek, xizmati mobaynida Ichki ishlar vazirining meʼyoriy buyrugʻi talabini buzganligi uchun Toshkent shahar IIBB JXX PPX va JTSB xodimi U.Mahmudovning xatti-harakatlari “Intizomiy kengash”da koʻrib chiqilishi belgilandi.