Ijtimoiy tarmoqda “Lacetti” rusumli, 40O055OA davlat raqam belgili avtomobil haydovchisi va uning ortidan harakatlangan (video tasvirga olayotgan fuqaro) avtomobil haydovchisi yoʻlning qarama-qarshi harakatlanish uchun moʻljallangan boʻlagiga chiqib, svetoforning taqiqlovchi chirogʻiga rioya qilmasdan harakatlanganligi aks etgan video tarqaldi.

Video yuzasidan Fargʻona viloyati IIB YHXB xodimlari tomonidan surishtiruv olib borilganda, videoda aks etgan qoidabuzar haydovchi boshqaruvidagi “Lacetti” rusumli avtomobil 2021-yil dekabr oyida 40S077EA davlat raqam belgisi bilan roʻyxatdan oʻtkazilganligi maʼlum boʻldi. Haydovchi aniqlanib, 1987-yilda tugʻilgan I.X.ga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 128⁵-moddasi 2-qismi hamda ishonchnomasiz transport boshqarganligi boʻyicha 135-moddasi 1-qismi tartibida bayonnoma tuzilib, avtomobil vaqtincha saqlash uchun jarima maydoniga qoʻyildi.

Shuningdek, mazkur qoidabuzar haydovchining ortidan videotasvirga olib, yoʻlning qarama-qarshi harakatlanish uchun moʻljallangan boʻlagiga chiqib harakatlangan haydovchini aniqlash choralari koʻrilmoqda.

Barcha haydovchilardan qoidalarga rioya qilishlarini soʻraymiz.