Joriy yilning 12-sentabr kuni soat 14:20 larda, Toshkent shahar, Bektemir tumani, TXAY ko‘chasida YPX xodimi S.Mambetov tomonidan "Nexia-2" rusumli avtomobil haydovchisiga boshqaruv vaqtida xavfsizlik kamarini taqmaganligi bois to‘xtash ishorasi ko‘rsatilgan. Haydovchi qonuniy talabni bajarmasdan harakatda davom etgan.

TXAY-Porloq ko‘chalari kesishgan chorrahada, svetoforning qizil chirog‘ida haydovchini to‘xtatish choralari ko‘rilgan. Avtomobil salonida bo‘lgan yo‘lovchilar ham jarayonga aralashgan. YPX xodimi tomonidan tushuntirish berilib, haydovchi, 1994 yilda tug‘ilgan A.A.ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 125 va 194-moddalari tartibida bayonnoma tuzilib, avtomobil vaqtincha saqlash uchun jarima maydoniga qo‘yilgan. Mazkur holatda haqoratli so‘zlar hamda turli xatti-harakatlar bilan YPX xodimining xizmat faoliyatiga xalaqit bergan yo‘lovchiga nisbatan o‘rnatilgan tartibda chora ko‘riladi.

Barcha haydovchilardan tartibga soluvchilarning ishoralariga, qoidalarga rioya qilishlarini, yo‘lovchilardan esa haydovchi va YPX xodimining muloqotiga aralashib, xizmat faoliyatga xalaqit bermasliklarini so‘raymiz.