Darhaqiqat, Prezidentimiz huzurida avtomobil yo‘llarida inson xavfsizligini ishonchli ta’minlash va o‘lim holatlarini kamaytirish bo‘yicha 2022-yilning 11-fevral kuni o‘tkazilgan videoselektor yig‘ilishida Davlat yo‘l harakati xavfsizligi xizmatiga bir qator topshiriq va vazifalar yuklatildi.

Mazkur topshiriq va vazifalar ijrosini to‘liq ta’minlash maqsadida Ichki ishlar vazirining o‘rinbosari B.T.Abdullaev rahbarligida Davlat yo‘l harakati xavfsizligi xizmatining mas’ul xodimlaridan iborat ishchi guruh tashkil qilindi.

Ishchi guruh tomonidan birinchi navbatda yo‘l harakati xavfsizligini ta’minlash sohasida normativ-huquqiy bazani mustahkamlash va mazkur hujjatlarda belgilangan tadbirlarni amaliyotga joriy etish belgilab olindi.

2022-yilning aprel oyidan boshlab bugungi kunga qadar ishchi guruh tomonidan tayyorlangan loyihalar asosida O‘zbekiston Respublikasining 1 ta qonuni, Prezidentimizning 5 ta, Vazirlar Mahkamasining 11 ta qarorlari qabul qildi.

Shuningdek, Ishchi guruh tomonidan tayyorlangan 4 ta qonun va 6 ta Hukumat qarori loyihalari Vazirlar Mahkamasida va yana 6 ta qaror loyihasi vazirlik hamda idoralarda ko‘rib chiqilmoqda.

Ta’kidlash lozimki, yuqorida sanab o‘tilgan me’yoriy-huquqiy hujjatlarni ishlab chiqishda asosiy e’tibor – yo‘llarda harakatlanish madaniyatini oshirish, yo‘l-transport hodisalarining oldini olish va har bir fuqaroning yo‘llarda hayoti va salomatligini asrashga qaratildi.

Qabul qilingan qarorlarning eng asosiysi bu Prezidentimizning 2022-yil 4-apreldagi “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi PQ-190-son hamda 2022-yil 13-iyuldagi “2022 – 2026 yillar davomida amalga oshirilishi mo‘ljallangan “xavfsiz va ravon yo‘l” umummilliy dasturini tasdiqlash to‘g‘risida”gi PQ-316-son qaror bo‘ldi.

Prezidentimizning PQ-190-son qarori bilan ekspluatasiya-montaj bo‘linmalari hokimliklar tasarrufidan hududiy Yo‘l harakati xavfsizligi boshqarmalariga o‘tkazildi va ularning zimmasiga Nukus va Toshkent shaharlari, viloyatlar, tuman(shahar)lar markazlarida yo‘l belgilari, ko‘rsatkichlari va svetoforlarni o‘rnatish, yo‘l chiziqlarini chizish vazifalari yuklatildi.

Yo‘l harakati xavfsizligini ta’minlash Respublika maxsus komissiyasi faoliyati yo‘lga qo‘yildi.

Davlat yo‘l harakati xavfsizligi xizmatining “Xavfsiz yo‘l va xavfsiz piyoda” respublika jamg‘armasi tashkil etildi.

Alohida to‘xtalib o‘tish lozimki, PQ-316-son qaror bilan tasdiqlangan 840 banddan iborat 5 yilga mo‘ljallangan (2022-2026-yillar) “xavfsiz va ravon yo‘l” umummilliy dasturida ilk bor har bir viloyat kesimida, yilma-yil ajratilgan va mas’ul ijrochilar ko‘rsatgan holda quyidagi 5 ta dolzarb yo‘nalish bo‘yicha aniq parametrlar bilan manzilli chora-tadbirlar belgilandi:

Ma’lumot uchun: Ijtimoiy tarmoqlarda tarqatilgan xabarlarda mamlakat doirasidagi global harakatlar rejasi haqida so‘ralgan (Где глобалный план действий в рамках страны?)

1) yo‘l infratuzilmasini kompleks takomillashtirish yo‘nalishi;

(mazkur yo‘nalishda, jumladan Qoraqalpog‘iston Respublikasida 15 700 ta yangi yo‘l belgilarini o‘rnatish, yaroqsiz holatdagi 27 000 tasini almashtirish, maktablar oldida tezlikni cheklovchi 1 400 ta yo‘l belgilarini o‘rnatish, aholi punktlarida 69 km yo‘llarni sun’iy yoritish, 131 km velosiped yo‘laklarini qurish belgilangan)

2) yo‘llarda harakatni boshqarish tizimini raqamlashtirish yo‘nalishi;

(mazkur yo‘nalishda, jumladan Andijon viloyatida 2023-yilda Yo‘llarda transport oqimini nazorat qilish monitoring markazini tashkil qilish, yo‘l belgilari joylari aniq ko‘rsatilgan yagona elektron xaritani yaratish, qoidabuzarliklarni qayd etuvchi 206 ta kamera o‘rnatish nazarda tutilgan)

3) jamoat transportini rivojlantirish va raqamlashtirish yo‘nalishi;

(mazkur yo‘nalishda, jumladan Buxoro viloyatida 21 ta yangi jamoat transporti yo‘nalishlarini tashkil qilish, 195 ta jamoat transporti yo‘nalishlarini avtomatlashtirilgan dispetcherlik xizmatiga o‘tkazish, 80 ta bekatni yo‘lovchilarga ma’lumotlarni real vaqt rejimida taqdim etuvchi monitorlar bilan jihozlash va boshqalar ko‘zda tutilmoqda)

4) yo‘l harakati xavfsizligini ta’minlash bo‘yicha tashviqot ishlarini kuchaytirish, bolalarga yo‘l harakati qoidalarini amaliy o‘rgatishni yo‘lga qo‘yish yo‘nalishi;

(mazkur yo‘nalishda, jumladan Navoiy viloyatida 323 ta maktabda yo‘l harakati qoidalari o‘rgatish sinfxonalarini tashkil qilish, yo‘l-transport hodisalari eng ko‘p yuz beradigan yo‘llarda 780 ta yo‘l harakati xavfsizligini ta’minlashning tashviqot vositalarini (reklama-axborot plakatlarini) o‘rnatish, 108 marta “Diqqat, yo‘lovchi!”, “Diqqat, bolalar!” nomli profilaktik tadbirlarni o‘tkazish va boshqa choralar belgilanmoqda)

5) haydovchilarni tayyorlash va qayta tayyorlash tizimini takomillashtirish hamda avtotransport vositalarining texnik holati ustidan nazoratni kuchaytirish yo‘nalishi;

(mazkur yo‘nalishda, jumladan Namangan viloyatida mavjud 45 ta haydovchilarni tayyorlash va qayta tayyorlash o‘quv tashkilotlarini, shuningdek, 12 ta avtotransport vositalarini texnik ko‘rikdan o‘tkazish markazlarini Yo‘l harakati xavfsizligi xizmatining monitoring markaziga integrasiya qilish va boshqa choralar nazarda tutilmoqda)

“Xavfsiz va ravon yo‘l” umummilliy dasturidagi 840 bandning barchasi “IJRO.GOV.UZ” ijro intizomi idoralararo yagona elektron tizimiga joylashtirilgan bo‘lib, ijrosi O‘zbekiston Respublikasi Prezidenti Administratsiyasi va Hisob Palatsi tomonidan nazoratga olingan.

Bundan tashqari, O‘zbekiston Respublikasi Vazirlar Mahkamasining 2022 yil 12 apreldagi 172-son qarori bilan “Yo‘l harakati qoidalari” yangi tahrirda tasdiqlandi.

Bunda amalda bo‘lgan to‘g‘risida “Yo‘l harakati qoidalari”ning 141 ta bandiga o‘zgartirish va qo‘shimchalar kiritildi hamda 20 ta yangi tushuncha joriy qilindi.

Tegishli yo‘l belgilari o‘rnatilgan maktab va maktabgacha ta’lim tashkilotlariga yetmasdan va o‘tib ketib 300 metrdan kam masofada soatiga 30 kilometrdan, turar joy dahalari va yondosh hududlarda (uy-joy binolari orasidagi yer uchastkasida) esa soatiga 20 kilometrdan oshirmasdan harakatlanish belgilab qo‘yildi.

Vazirlar Mahkamasining 2022-yil 26-apreldagi “Ta’lim muassasalarida yo‘l harakati qoidalari targ‘ibotini kuchaytirish chora-tadbirlari to‘g‘risida” 212-son qarori talablari asosida ichki imkoniyatlardan kelib chiqqan holda Yo‘l harakati xavfsizligi xizmati va uning hududiy boshqarmalarida umumiy va o‘rta ta’lim muassasalari bilan hamkorlik qilish guruhi katta inspektori lavozimlari joriy etildi.

Ta’lim muassasalarida ko‘ngilli yoshlar ishtirokida yo‘l harakati qoidalarini faol targ‘ib qiluvchi “Yo‘l harakati qoidalari yosh targ‘ibotchisi” klubi tashkil etildi.

Vazirlar Mahkamasining 2023-yil 3-aprel kuni “Yo‘l harakati qoidalariga avtomobil yo‘llarida harakat xavfsizligini ta’minlashga qaratilgan o‘zgartirish kiritish to‘g‘risida” 140-son qarori bilan Nukus va Toshkent shaharlarida, viloyatlar va tumanlarning markazlarida, shuningdek shaharlar hududlarida transport vositalarining tezligi soatiga 60 kilometr qilib belgilandi.

Qabul qilingan qarorlarning barchasi yo‘l harakati xavfsizligini ta’minlashga qaratilgan bo‘lib, ularda belgilangan normalar asosida Davlat yo‘l harakati xavfsizligi xizmati tomonidan bir qator amaliy ishlar amalga oshirilmoqda.

Jumladan, ekspluatasiya-montaj bo‘linmalari tomonidan o‘z mas’ullik hududlarida 2022 yilda “Xavfsiz va ravon yo‘l” umummilliy dasturida belgilangan 10902 ta yo‘l belgilari, maktablar oldida 3376 ta tezlikni cheklovchi yo‘l belgilari, 1390 ta yo‘l ko‘rsatkichlari o‘rnatildi, 16900 ta eskirgan yo‘l belgilari yangisiga almashtirildi, 101 ta svetofor qurilmasi, 204 ta piyodalar svetofori o‘rnatildi, 220 ta svetofor qurilmasi  rekonstruksiya qilindi.

Svetofor qurilmalarini o‘rnatishdan oldin bir qator o‘rganish olib boriladi.

Bunda svetofor qurilmasi o‘rnatilishi rejalashtirlayotgan chorraha yoki yo‘l uchastkasi shaharsozlik normalari va qoidalariga (ShNQ) mosligi nuqtai-nazaridan o‘rganiladi, shuningdek, ushbu joydan o‘tadigan piyodalar va transport vositalarining harakat jadalligi hisoblanadi.

Mazkur joy amaldagi normativ-huquqiy hujjatlar talablariga javob bersa, svetofor qurilmasini o‘rnatish bo‘yicha ijobiy xulosa qilinadi.

Shuningdek, 993 ta maktabda yo‘l harakati qoidalarini o‘rgatish sinfxonalari, 903 ta mahallada hamda 873 ta maktabgacha ta’lim tashkilotlarida yo‘l harakati qoidalarini o‘rgatish maydonchalari tashkil etildi.

Ta’kidlab o‘tish lozimki, 2022-yilga qadar respublika bo‘yicha bor-yo‘g‘i 67 ta maktabda sinfxonalar, maktabgacha ta’lim tashkilotlarida 56 ta, mahallalarda bor-yo‘g‘i 5 ta yo‘l harakati qoidalarini o‘rgatish maydonchalari mavjud bo‘lgan, xolos.

Respublika bo‘yicha 15 ta “Nurli maskan” maktablari hududlarida “Yo‘l harakati qoidalarini o‘rgatish maxsus maydoncha”lar tashkil etildi.

Shuningdek, ko‘zi ojiz va zaif ko‘ruvchilar, jumladan, bolalar ta’lim olayotgan, mehnat qilayotgan hamda yashash hududlarida ovozli svetoforlar va hassa bilan yurish uchun  moslashtirilgan alohida yo‘laklar tashkil etildi.

Yo‘l harakati ishtirokchilari, jumladan, velosipedlarning harakatlanish uchun qulayliklar yaratish maqsadida respublika bo‘yicha 408 km. veloyo‘laklar tashkil etildi.

IIV JXD YHX xizmatining tashabbusi bilan 154 ta piyodalar o‘tish joylari yoritildi, 651 ta piyodalar o‘tish joylaridagi svetoforlarning yonish vaqti piyodalar ustunligini inobatga olgan holda o‘zgartirildi.

Bu boradagi ishlar jadallashtirilib, 2023-yilda o‘tgan 3 oyida respublika bo‘yicha ekspluatasiya-montaj bo‘linmalari tomonidan 85 ta transport (2022-yilning shu davrida bor-yo‘g‘i 15 ta), 57 ta piyodalar (2022-yilda 21 ta) svetoforlari o‘rnatildi.

Maktablarning oldilarga 32 ta svetofor qurilmalari, 429 ta suniy notekisliklar  o‘rnatildi. 

8527 ta yo‘l belgilari, maktablar oldida 429 ta tezlikni cheklovchi yo‘l belgilari o‘rnatildi, 18481 ta eskirgan yo‘l belgilari yangisiga almashtirildi, 4508 km uzunlikdagi yo‘llarga yo‘l yotiq chiziqlari chizildi.

Shuningdek, maktablarda 276 ta yo‘l harakati qoidalarini o‘rgatish sinfxonalari, mahallada va maktabgacha ta’lim tashkilotlarida 166 ta yo‘l harakati qoidalarini o‘rgatish maydonchalari tashkil etildi, 59904 m² uzunlikdagi yo‘llarga yo‘l yotiq chiziqlari chizildi.

Birgina Toshkent shahri misolida oladigan bo‘lsak, Toshkent shahar IIBB JXX Yo‘l harakati xavfsizligi boshqarmasi ekspluatasiya-montaj boshqarmasining ish tartibi to‘liq o‘zgartirildi.

Ekspluatatsiya-montaj boshqarmasi zamonaviy maxsus texnikalar bilan ta’minlandi, ish uch smenada tashkil etildi va xodimlar uchun alohida maxsus kiyimboshlar ajratildi.

Olib borilgan tadbirlar natijasida 3 oy davomida Toshkent shahridagi maktablarda 48 ta yo‘l harakati qoidalarini o‘rgatish sinfxonalari, mahallada va maktabgacha ta’lim tashkilotlarida 96 ta yo‘l harakati qoidalarini o‘rgatish maydonchalari tashkil etildi.

2022-yilning aprel oyigacha bo‘lgan davrda Toshkent shahrida bor-yo‘g‘i 11 ta maktabda yo‘l harakati qoidalarini o‘rgatish sinfxonalari tashkil etilgan bo‘lsa, mahalla va maktabgacha ta’lim tashkilotlarida yo‘l harakati qoidalarini o‘rgatish maydonchalari mavjud bo‘lmagan.

2023-yilda o‘tgan 3 oyi davomida ekspluatasiya-montaj boshqarmasi tomonidan 7 ta transport, 3 ta piyodalar svetoforlari o‘rnatildi.

Maktablarning oldilarga 4 ta svetofor qurilmalari, 48 ta suniy notekisliklar  o‘rnatildi.  

 866 ta yangi yo‘l belgilari, maktablar oldida 386 ta tezlikni cheklovchi yo‘l belgilari o‘rnatildi, 604 ta eskirgan yo‘l belgilari yangisiga almashtirildi.

Asosiy e’tibor yo‘l harakatini tashkil etishning texnik vositalari hamda yo‘l chiziqlarining ahvoliga qaratilmoqda.

Toshkent shahrining barcha tumanlarining ko‘chalariga yo‘l yotiq chiziqlari chizilishi yo‘lga qo‘yildi.

Toshkent shahri bo‘yicha jamoat transporti ustuvorligini ham to‘siqsiz harakatlanishini ta’minlash 2023-yilda 116,3 km uzunlikdagi 13 ta alohida avtobus yo‘laklarini tashkil qilish ko‘zda tutilgan.

Bugungi kunda tashkil etilgan 6 ta alohida avtobus tasmalarini  ajratib turuvchi yotiq chiziqlar chizildi.

Jumladan, A.Navoiy-Beruniy ko‘chasida 7 km., A.Temur ko‘chasida 10 km (ko‘chaning ikki tomoni hisoblanganda) avtobuslar uchun alohida yo‘lak takshil qilingan bo‘lib, hozirgi kunda M.Ulug‘bek ko‘chasi bo‘ylab (T.Malik ko‘chasidan Feruza ko‘chasigacha), Feruza ko‘chasi bo‘ylab (M.Ulug‘bek ko‘chasidan Munavvar Qori ko‘chasigacha) va Munavvar Qori ko‘chasi bo‘ylab temir yo‘l kesishmasigacha bo‘lagan qismlarida “A” “Yo‘lning faqat yo‘nalishli transport vositalari uchun mo‘ljallangan tasmasini bildiruvchi” yo‘l yotiq chiziqlari chizildi va “Yo‘nalishli transport vositalari uchun mo‘ljallangan tasma” yo‘l belgilari o‘rnatildi. Yo‘l chiziqlari chizish ishlari davom ettirimoqda.

Ekspluatatsiya-montaj boshqarmasida yo‘l chiziqlarini chizish bo‘yicha 6 ta guruh tuzilib, 3 smenalik ish faoliyati tashkillashtirilgan bo‘lib, har bir guruhga 5 nafardan ishchi biriktirildi.

Bugungi kunda Toshkent shahrida yo‘l harakatini tashkil etishning texnik vositalarini o‘rnatish, ularga texnik xizmat ko‘rsatish hamda yo‘l chiziqlarini chizish ishlari davom ettirimoqda.

Alohida to‘xtalib o‘tish lozimki, avtomobil yo‘llari infratuzilmasini takomillashtirish va ularning sifatini yaxshilash, yo‘l harakati ishtirokchilarining xavfsiz harakatlanishi uchun ishonchli shart-sharoitlar yaratish ta’minlashga mablag‘ zarur bo‘ladi.

Prezidentimizning 2022-yil 4-apreldagi PQ-190-son qarori bilan Nukus va Toshkent shaharlari, viloyatlar, tuman(shahar)lar markazlarida yo‘l belgilari, ko‘rsatkichlari va svetoforlarni o‘rnatish, yo‘l chiziqlarini chizish zarur bo‘lgan mablag‘ masalalari hal qilindi.

Respublika bo‘yicha ekspluatatsiya-montaj bo‘linmalarining faoliyati tubdan o‘zgartirildi, moddiy-texnik bazasi yangilanib, yo‘l belgilari, ko‘rsatkichlari va svetoforlarni o‘rnatish bosqichma-bosqich amalga oshirilmoqda.

Shu bilan bir qatorda, ta’kidash lozimki, ob-havo sharoitini inobatga olgan holda yo‘l chiziqlarini chizish mavsumi endi boshlandi.

Alohida to‘xtalib o‘tish lozimki, yo‘llarga chizilgan yo‘l chiziqlarining uzoq vaqt saqlanib turishida bo‘yoqlarning sifati alohida o‘rin tutadi. Shu maqsadda bo‘yoqlarning sifatini xalqaro, jumladan, Yevropa standartlariga mosligini ta’minlash maqsadida xalqaro tajribalarni o‘rganish yo‘lga qo‘yildi.

Jumladan, Turkiya, Germaniya, Fransiya, Belorusiya va Rossiya kabi davlatlarning yo‘llarida yo‘l chiziqlarini chizishda foydalanilayotgan bo‘yoqlarning sifati joylarga chiqqan holda o‘rganildi.

O‘rganish natijalari bo‘yicha O‘zbekiston Respublikasi Prezidenti Administratsiyasi, Prezident huzuridagi Xavfsizlik Kengashi hamda Vazirlar Mahkamasiga takliflar kiritildi.

Davlat yo‘l harakati xavfsizligi xizmati tomonidan yo‘l harakati xavfsizligini ta’minlash, yo‘l-transport hodisalarining oldini olish bo‘yicha amalga oshirilayotgan ishlarni yoritib borish hamda fuqarolarga o‘z vaqtida yetkazilishin ta’minlash maqsadida Yo‘l harakati xavfsizligi xizmatining “yhxx.uz” rasmiy veb sayti, “Telegram” messenjerida, “t.me/yhxx_uz”, “Facebook”, “Instagram” va “YouTube” ijtimoiy tarmoqlari tashkil etildi.

Bundan tashqari, Davlat yo‘l harakati xavfsizligi xizmati tomonidan amalga oshirilayotgan ishlar ommaviy axborot vositalari va ijtimoiy tarmoqlarda doimiy ravishda yoritib borilmoqda.

Jumladan, 2022-yilda televidenieda 4215 ta lavha va ko‘rsatuvlar namoish etildi, radioda 6097 ta eshittirishlar, gazeta va jurnallarda 1060 ta maqolalar chop etildi.

Shuningdek, Yo‘l harakati xavfsizligi xizmatining rasmiy veb-sayti yhxbb.uzda va ijtimoiy tarmoqlardagi “Telegram”, “Facebook” va “Instagram” ijtimoiy tarmoqlaridagi sahifalarida 11246 ta, Ichki ishlar vazirligining rasmiy veb-saytida 1489 ta, boshqa saytlarda 1952 marta ma’lumotlar, ko‘rsatuv, lavha va roliklar joylashtirildi.

Yo‘l harakati xavfsizligini targ‘ib qilish maqsadida tashkil etilgan “Avtohamroh” jurnali “Yuqori darajadagi yo‘l harakati madaniyati uchun” shiori ostida 2022-yil davomida nashr etilishi ta’minlandi.

Bolalarga yo‘llarda, chorrahalarda va piyodalar o‘tish joylarida harakatlanish asoslarini amaliy-ko‘rgazmali tarzda o‘rgatish maqsadida “Yosh avtohamroh” nomli bolalar uchun ko‘rgazmali qurol jurnalga ilova sifatida chop etilmoqda.

Bundan tashqari, Davlat yo‘l harakati xavfligi xizmatining tashabbusi bilan Xorijiy davlatlar tajribalar asosida 1690 dona “Bolalarga yo‘l harakati qoidalarini” o‘rgatish va targ‘ib qilish bo‘yicha meriallar to‘plami (sumka) ishlab chiqildi.

To‘plam tarkibiga YPX inspektori shaklidagi “Yo‘lbarsvoy va Bo‘rivoy” yumshoq o‘yinchoqlari, “Yosh yo‘l harakati targ‘ibotchisi” logotipi tushirilgan kepka va futbolka, “Maktabdan uygacha – uydan maktabgacha eng xavfsiz yo‘l xaritasi”, “Kichik piyoda qoidasi kitobchasi”, “Yosh vilosipedchi” nomli bukletlar, “Qoidalarni o‘rganamiz” nomli bo‘yama kitob, “Bolalar bilishi mumkin bo‘lgan 15 ta qoida” brashurasi hamda “Yashil chiroq” nomli pazllar kiritilgan.

Mazkur to‘plamlar bolalar ishtirokida o‘tkazilayotgan tadbirlarda maktab o‘quvchilari hamda maktabgacha ta’lim tashkilotlarining tarbiyalanuvchilariga tarqatildi. 

Bolalar ishtirokidagi yo‘l-transport hodisalarining oldini olishga, maktab o‘quvchilarida yo‘l harakati qoidalari bo‘yicha ko‘nikmalarni hosil qilish maqsadida 2022-yil 26-aprel kuni qabul qilingan Vazirlar Mahkamasining “Ta’lim muassasalarida yo‘l harakati qoidalari targ‘ibotini kuchaytirish chora-tadbirlari to‘g‘risida”gi 212-son qarori talablari asosida 2022-yil 22-25-iyul kunlari Toshkent viloyati Bo‘stonliq tumanida joylashgan Ichki ishlar vazirligiga qarashli “Oqtosh” sog‘lomlashtirish bolalar oromgohida “Yashil chiroq” musobaqasining respublika bosqichi o‘tkazildi.

Bolalar hayotini asrash, yosh avlodni madaniyatli harakat ishtirokchilari sifatida tarbiyalashga yo‘naltirilgan “Yashil chiroq” musobaqalariga barcha maktablarning o‘quvchilarini jalb etish, bolalar ishtirokidagi yo‘l-transport hodisalarining oldini olishga xizmat qiladi.

Bugungi kunda “Yashil chiroq – 2023” musobaqasining hududiy bosqichlari o‘tkazilmoqda.

Bundan tashqari, yo‘l harakati xavfsizligini ishonchli ta’minlash, yo‘l-transport hodisalarining barvaqt oldini olish maqsadida maktabgacha ta’lim tashkilotlari tarbiyalanuvchilari va maktab o‘quvchilari o‘rtasida kompleks targ‘ibot va tashviqot ishlarini tashkil etish to‘g‘risida Ichki ishlar vazirligi Jamoat xavfsizligi departamenti Yo‘l harakati xavfsizligi xizmati va “Tomosha” bolalar musiqiy teatr-studiyasi o‘rtasida 2022-yil 6-may kuni Memorandum imzolandi.

 “1-iyun - Xalqaro bolalarni himoya qilish kuni” munosabati bilan joriy yil 31-may kuni bolalarga sovg‘a sifatida “Tomosha” bolalar musiqiy teatr-studiyasida “Chorraha” nomli spektakl primerasi taqdim etildi.

Spektaklning maqsadi bolalarga yo‘l harakati qoidalari asoslarini zamonaviy axborot texnologiyalardan foydalangan holda ko‘rgazmali tarzda o‘rgatish, ularning yo‘l harakati qoidalariga amal qilishlarini targ‘ib qilish, shuningdek, qoidalarga rioya qilmaslik ko‘ngilsiz holatlarni kelib chiqishi mumkinligi haqida ogoxlantirish, eng asosiysi bolalar ishtirokidagi yo‘l-transport hodisalarini oldini olishdan iboratdir.

Spektakl ssenariysi Prezidentimizning PQ-190-son qarorida belgilangan “Umr tezlikdan muhimdir”, “Xavfsizlik kamari – hayot garovi” va “Yo‘l harakati intizomi bolalikdan boshlanadi” shiorlari ostida targ‘ibot ishlarini kuchaytirish maqsadida Ichki ishlar vazirligi va “Tomosha” bolalar musiqiy teatr-studiyasi ijodkorlari tomonidan yaratildi. Mazkur spektakl hududlarda namoyish etilmoqda.

Alohida to‘xtalib o‘tish lozimki, Ichki ishlar vazirligi Davlat yo‘l harakati xavfsizligi xizmatining tashabbusi bilan Toshkent shahar Yunusobod tumanida joylashgan 288-sonli umumiy o‘rta ta’lim maktabida “Yo‘l harakati qoidalarini” o‘qitish, “Ruyxatlash va imtihon olish” sinf xonalari, Davlat yo‘l harakati xavfsizligi xizmati tarixi muzeyi hamda “Yo‘l harakati qoidalarini o‘rganish” maydonchalari tashkil etildi.

Bundan tashqari, maktab o‘quvchilarida Yo‘l harakati qoidalari bo‘yicha dastlabki ko‘niklarini shakllantirish, bolalar ishtirokidagi yo‘l-transport transport hodisalarning oldini olish yuzasidan profilaktik tadbirlarni amalga oshirish maqsadida respublika bo‘yicha mavjud 10102 ta maktablarga Davlat yo‘l harakati xavfsizligi xizmati xodimlari o‘z xizmat hududi bo‘yicha (kvadrat tizimi asosida) biriktirilib, maktab o‘quvchilari bilan ishlashi yo‘lga qo‘yildi.

Bundan tashqari, Vazirlar Mahkamsining 2022 yil 26 apreldagi 212-son qarori bilan joriy etilgan umumiy va o‘rta ta’lim muassasalari bilan hamkorlik qilish bo‘yicha katta inspektorlari tomonidan Maktab va maktabgacha ta’lim vazirligining hududiy boshqarmalari bilan hamkorlikda maktablarda “Diqqat yo‘lovchi”, “Diqqat bolalar”, “Yashil chiroq”, “Yo‘l harakati qoidalari bilimdoni”, “Eng namunali yo‘lovchi” kabi kompleks targ‘ibot va tashviqot tadbirlari o‘tkazilishi yo‘lga qo‘yildi.

Yo‘l harakati xavfsizligini ta’minlash, yo‘l-transport hodisalarining oldini olish bo‘yicha tadbirlar davom ettirilmoqda.

Ta’kidlab o‘tish lozimki, Yo‘l harakati xavfsizligini ta’minlash bo‘yicha tadbirlarni samarali tashkil etish va o‘tkazishni yo‘lga qo‘yishda rahbar xodimlar alohida ahamiyat kasb etishini inobatga olib, 2022 yilda Qoraqalpog‘iston Respublikasi IIV, Toshkent shahar va Toshkent viloyati IIBB hamda viloyatlar IIBlari Jamoat xavfsizligi xizmati Yo‘l harakati xavfsizligi boshqarmalarining rahbar xodimlari navbatdan tashqari attestatsiyadan o‘tkazildi.

O‘tkazilgan attestatsiya natijalariga ko‘ra 20 nafar xodim Ichki ishlar organlari xizmatidan bo‘shatildi, 11 nafar xodim egallab turgan lavozimidan ozod qilindi, 27 nafar xodim boshqa lavozimlarga o‘tkazildi
va 20 nafariga shartli ravishda sinov muddati berildi.

Xulosa o‘rnida: yuqorida Davlat yo‘l harakati xavfsizligi xizmatining ikkita yo‘nalishi bo‘yicha amalga oshirilayotgan ishlar to‘g‘risida qisqacha to‘xtalib o‘tildi.

Eslatib o‘tamiz, Davlat yo‘l harakati xavfsizligi xizmati tomonidan amaliy tadbirlar ko‘z-ko‘z qilish, ijtimoiy tarmoqlarda maqtanib chiqarish yoki o‘zini ko‘rsatish uchun emas, balki barcha yo‘l harakati ishtirokchilarining xavfsizligini ta’minlash, yo‘l-transport hodisalarning oldini olish maqsadida amalga oshirilmoqda.

Shu bilan birga fuqarolarimizdan aniq manbaalarga asoslanmagan, haqiqatga to‘g‘ri kelmaydigan, odamlarni chag‘ituvchi, shuningdek, Davlat organlarini obro‘sizlantiruvchi xabarlarni ijtimoiy tarmoqlarga joylashtirmasliklarini so‘rab qolamiz.

IIV JXD Yo‘l harakati xavfsizligi xizmati