2022-yil 13-fevral kuni soat 12:30 larda Jizzax viloyati, Sharof Rashidov tuman hududidan oʻtgan M-39 avtomobil yoʻlining 983-kilometrida oq rangli “Nexia-3” rusumli transport vositasining davlat raqam belgisi toʻgʻri anglashga toʻsqinlik qiladigan qogʻoz bilan yopilgan holda “Termiz-Toshkent” yoʻnalishi boʻylab harakatlanib ketayotganligini koʻrgan YPX xodimi A.Ortiqov oldinda xizmat oʻtayotgan hamkasbi YPX xodimi N.Danaboyevga maxsus aloqa vositasi (ratsiya) orqali maʼlum qilib, ushbu avtomobilni toʻxtatish choralari koʻrilishini soʻragan.

Shundan soʻng, mazkur avtomobil haydovchisi M-39 yoʻli yoqasida joylashgan “Sharq” nomli ovqatlanish shahobchasi yaqiniga toʻxtab, transport vositasi davlat raqam belgisining ustiga yopishtirilgan qogʻozni olib tashlagan.

YPX inspektori N.Danaboyev qoidalarni chetlab oʻtgan “Nexia-3” rusumli avtomobil haydovchisidan tegishli meʼyoriy hujjatlarini taqdim etishni soʻragan vaqtda, haydovchi hujjatlarini taqdim etmagan va sodir etgan qoidabuzarligini ham tan olmagan.

Sodir etgan qoidabuzarligi uchun haydovchiga nisbatan YPX xodimi N.Danaboyev tomonidan Oʻzbekiston Respublikasi Maʼmuriy javobgarlik toʻgʻrisidagi Kodeksning 127-moddasi 2-qismi (davlat raqam belgilarini koʻrish imkoniyatini cheklaydigan, ularni anglashga toʻsqinlik qiladigan turli ashyolar oʻrnatish va qoplama surtish) hamda qonuniy talabni bajarmaganligi uchun 194-moddasi (Ichki ishlar organlari xodimining qonuniy talablarini bajarmaslik) tartibida maʼmuriy bayonnoma va imzo chekishdan bosh tortganligi boʻyicha dalolatnoma rasmiylashtirilib, “Nexia-3” rusumli avtomobil vaqtincha saqlash uchun jarima maydoniga qoʻyilgan.

Hozirda ushbu maʼmuriy ish yuzasidan Sharof Rashidov tumani IIB YHXB xodimlari tomonidan surishtiruv ishlari olib borilmoqda.