Oxirgi kunlarda Toshkent shahridagi chorrahalarda tadbirkorlik sub’yektlari tomonidan o‘rnatilgan yo‘l harakati qoidabuzarliklarini qayd etuvchi foto va video texnik vositalarining faoliyati to‘g‘risida bir qator lafhalar tarqatilib, munosabatlar bildirilmoqda.

Mazkur lavha va munosabatlarda keltirilgan holatlar Ichki ishlar vazirligi Jamoat xavfsizligi departamenti Yo‘l harakati xavfsizligi xizmati tomonidan o‘rganilib borilmoqda.

O‘rganishlar davomida lavha va munosabatlarda keltirilgan holatlarga obyektiv baho berish, yo‘l infratuzilmasi hamda texnik vositalarning holatini qayta ko‘rib chiqish, chorrahalarda yo‘l harakatini to‘g‘ri tashkil etish maqsadadi IIV JXD Yo‘l harakati xavfsizligi xizmati, Transport vazirligi, Toshkent shahar hokimligining mas’ul xodimlaridan iborat ishchi guruhi tuzildi.

Ta’kidlab o‘tish lozimki, Prezidentimizning 2020-yil 7-dekabrdagi PQ - 4913-son qarori bilan Yo‘l harakati xavfsizligini ta’minlash sohasida 2021-yil 1-martdan boshlab tadbirkorlik subyektlariga avtomobil yo‘llarida texnik vositalari o‘rnatish huquqi berilgan.

Ushbu qaror ijrosini ta’minlash maqsadida 2021-yil 21-aprel kuni qabul qilingan Vazirlar Mahkamasining “Yo‘l harakati xavfsizligini ta’minlash sohasiga xususiy sektorni jalb etishga doir qo‘shimcha chora-tadbirlar to‘g‘risida”gi 232-son qarori talablari asosida tadbirkorlik subyektlari tomonidan avtomobil yo‘llarida texnik vositalar o‘rnatib kelinmoqda.

Mazkur qarorlar talablari asosida tadbirkorlik subyektlari tomonidan o‘rnatilgan texnik vositalar bo‘yicha mas’ul tashkilot va idoralar tomonidan tegishli texnik xulosalar berilib, test sinovlaridan o‘tkazilgandan keyin ishga tushiriladi.

Shunday bo‘lsada, bugungi kunda ishchi guruh tomonidan chorrahalarda yo‘l harakati qanday tashkil etilganligi (yo‘l belgilari va ko‘rsatkichlari to‘g‘ri o‘rnatilganligi, yo‘l chiziqlari chizilganligi va boshqalar), chorrahalardagi texnik vositalarning holati qaytadan o‘rganib chiqilmoqda.

Ishchi guruh tomonidan o‘tkazilayotgan o‘rganishlar natijalari bo‘yicha qo‘shimcha axborot taqdim etiladi.

IIV JXD Yo‘l harakati xavfsizligi xizmati