2025-yil 15-iyul kuni Ichki ishlar vazirligi Jamoat xavfsizligi departamenti Yo‘l harakati xavfsizligi xizmati rahbariyati tomonidan 2025/2026 o‘quv yili uchun oliy ta’lim muassasalariga qabul imtihonlari o‘tkazilayotgan joylardagi harakat xavfsizligi holati o‘rganildi.

Tashrif doirasida test sinovlari o‘tkazilayotgan ob’yektlardagi umumiy harakat xavfsizligi holati atroflicha tahlil qilindi. Bu jarayonda piyodalar va transport vositalari harakati, yo‘l infratuzilmasi, belgilangan harakat tartibi hamda ishtirokchilar oqimini xavfsiz va tartibli tashkil etish choralari ko‘rib chiqildi.

Joriy yilning 14-iyulidan 23-iyuligacha test sinovlari 2-bosqichda bo‘lib o‘tadi. Bu davrda respublika bo‘yicha 39 ta ob’yektda joylashgan 65 ta binoda, jami 671 397 nafar abituriyent oliy ta’lim muassasalariga kirish uchun test sinovlarida ishtirok etadi.

Yo‘l harakati xavfsizligi xizmati barcha fuqarolardan, ayniqsa, sinov joylari atrofida harakatlanayotgan haydovchi va piyodalardan ehtiyotkor bo‘lishlarini so‘raydi.