Yo‘l harakati xavfsizligini ta’minlash bo‘yicha “Farg‘ona tajribasi” amalga oshiriladi: viloyati hokimligi va Ichki ishlar vazirligi o‘rtasida hamkorlik memorandumi imzolandi.Yo‘l harakati xavfsizligini ta’minlash bo‘yicha “Farg‘ona tajribasi” amalga oshiriladi: viloyati hokimligi va Ichki ishlar vazirligi o‘rtasida hamkorlik memorandumi imzolandi.

Bugun viloyat hokimligida Farg‘ona viloyati hokimligi va O‘zbekiston Respublikasi Ichki ishlar vazirligi o‘rtasida viloyat hududida yo‘l harakati xavfsizligini ta’minlash bo‘yicha amaliy chora-tadbirlarni belgilash bo‘yicha hamkorlik memorandumi imzolandi.

Memorandumga viloyat hokimi Xayrullo Bozorov va Ichki ishlar vazirining o‘rinbosari – Jamoat xavfsizligi departamenti boshlig‘i Bekmurod Abdullayev imzo chekdilar.

Viloyat hududida yo‘l harakati qoidalari buzilishi profilaktikasi va ularga chek qo‘yish, yo‘l-transport hodisalarining oldini olish chora-tadbirlari samardorligini oshirish, yo‘l harakati xavfsizligini ta’minlashga oid fundamental, amaliy va innovasion tadqiqotlarni o‘tkazish maqsadida “Yo‘l xaritasi” tuzilishi belgilab olindi. Unga ko‘ra viloyat hududida yo‘l infratuzilmasi rivojlantirilib, transport vositalarining texnik holati ustidan nazorat kuchaytiriladi. Shuningdek, haydovchilarning huquqiy bilimi va o‘zaro madaniyatini yuksaltirish tadbirlari amalga oshiriladi. Sohaga zamonaviy axborot -komunikasiya texnologiyalarining qamrovi kengaytirilib, yo‘l harakati xavfsizligini ta’minlash bo‘yicha tahlillar yuritiladi. Muammolar o‘rganiladi va xorijiy tajribadan kelib chiqib aniq yechimlar belgilanadi.

“Bu hamkorlik sohada “Farg‘ona tajribasi” bo‘ladi. Viloyat hokimligi hamda Ichki ishlar vazirligi birgalikda amalga oshirishi rejalashtirgan chora-tadbirlar natijasida viloyatda yo‘l-transport hodisalari kamida 50 foiz kamayishiga erishish maqsad qilingan. Haydovchilarimiz mashinaga xotirjam o‘tirishadi”,- dedi Ichki ishlar vazirining o‘rinbosari – Jamoat xavfsizligi departamenti boshlig‘i Bekmurod Abdullayev.

Ma’lumot o‘rnida 10 oylik yakunlari bo‘yicha viloyatda 1173 ta yo‘l-transport hodisalari sodir bo‘lgan.984 nafar fuqaro tan jarohati olgan. 189 nafar fuqarolar hayotdan bevaqt ko‘z yumgan.