YPX xodimi yo‘l-transport hodisasi sodir bo‘lganda MADX-ADX navbatchisiga zudlik bilan xabar beradi va jabrlanganlarga birinchi tibbiy yordam ko‘rsatadi va sodir bo‘lgan yo‘l-transport hodisasi bo‘yicha ma’lumotlarni (shaxslarning familiyasi, ismi, sharifi, yashash manzili va telefon raqami yo‘l-transport hodisasi sodir bo‘lgan joy, vaqti, turi va holati, transport vositasi rusumi, rangi va davlat raqami, yo‘l-transport hodisasiga aloqador transport vositalari haqida ma’lumot, yo‘l-transport hodisasi haqida ma’lumotga ega bo‘lgan va bevosita ko‘rgan guvohlar haqida ma’lumot) to‘playdi.

Jabrlanganlar sonini, ular jarohatining og‘irlik darajasini aniqlashi, tez tibbiy yordam chaqirtirishi va kelguniga qadar birinchi tibbiy yordam ko‘rsatishi, zaruratga qarab tibbiyot muassasasiga yuborilishini tashkillashtirishi lozim.

Shuningdek, YPX xodimi yo‘l-transport hodisalari natijasida transport vositalari, yo‘l va boshqa inshootlarga, o‘zgalarning mol-mulkiga zarar yetkazilgan, shaxslarning badaniga yengil shikast yetkazilgan holatlarda:

-hodisa sodir bo‘lgan joyni ko‘zdan kechirish bayonnomasini tuzishi va hodisa joyining chizmasini chizishi;

-hodisa ishtirokchilari va guvohlardan tushuntirish xatlarini olishi;

-yo‘l-transport hodisasi yuz bergan joydan ketib qolgan haydovchilarni aniqlash choralarini ko‘rishi;

-haydovchi transport vositasini alkogolli ichimlikdan, giyohvandlik moddasi ta’siridan yoki o‘zgacha tarzda mast holda boshqarganligini aniqlash uchun tibbiy ko‘rikdan (alkotesterdan) o‘tkazishi, bosh tortgan taqdirda bu haqda bayonnoma tuzishi hamda majburiy tartibda tibbiy ko‘rikdan o‘tkazish uchun belgilangan tibbiy muassasaga (narkologik dispanser) olib borishi;

-yo‘l-transport hodisasi yuz bergan joydan ketib qolgan transport vositasining ehtimoldagi yo‘nalishini, rusumini, davlat raqamini, rangini, transport vositasi va haydovchining alohida belgilarini aniqlashi, transport vositasini ushlash choralarini ko‘rish maqsadida navbatchilik qismiga xabar berishi, transport vositasini ko‘rgan shaxslar doirasini aniqlashi;

-transport vositalari harakatining tirbandligi yuzaga kelishining oldini olish choralarini ko‘rishi va harakat xavfsizligini ta’minlashi lozim.

Shuningdek, YPX inspektori tomonidan yo‘l-transport hodisasi sodir etilgan vaqtda ishni odilona ko‘rib chiqilishini ta’minlash, aybdorlik darajasiga huquqiy baho berish uchun sud-ekspertizalari o‘tkazilishini ta’minlash maqsadida yo‘l-transport hodisasida ishtirok etgan transport vositalari vaqtinchalik saqlab turish uchun jarima maydoniga qo‘yilishi talab etiladi.

Bunda, yo‘l harakati qoidalarini buzgan haydovchiga nisbatan O‘zbekiston Respublikasi MJtKning 133-134-moddalari va yo‘l-transport hodisasi yuz bergan joydan ketib qolgan transport vositasining haydovchilarga nisbatan qo‘shimcha ravishda ushbu Kodeksning 137-moddasi (Yo‘l-transport hodisasi yuz bergan joydan ketib qolish) bilan javobgarlik masalasi ko‘rib chiqiladi.