2022-yil 9-yanvar kuni Qashqadaryo viloyati, Qarshi shahar, Xonobod va Jayhun koʻchalari kesishgan chorraha yaqinida YPX xodimi J. Xasanov tomonidan “Epica” rusumli avtomobil haydovchisi toʻxtatilgan. Tekshiruv davomida haydovchi U.B.ning ogʻiz boʻshligʻidan spirtli ichimlik hidi kelganligi bois, YPX xodimi uni tekshiruvdan oʻtishga taklif qilgan. Haydovchi spirtli ichimlik ichganligini oʻzi tan olgan, lekin tekshiruvdan oʻtishdan bosh tortgan. Belgilangan tartibda bayonnoma tuzilib, avtomobilni jarima maydoniga olib borish vaqtida, haydovchi chora koʻrilmasligi evaziga YPX xodimi 1.500.000 (bir million besh yuz ming) soʻm miqdoridagi pullarni pora tariqasida taklif qilgan.

Xodim ushbu holat yuzasidan IIV SHXBB Qashqadaryo viloyati boʻyicha boshqarmasi xodimlariga xabar berib, pora taklif etayotgan haydovchiga qonuniy chora koʻrilishini soʻragan.

Shu kuni soat 19:10 larda, huquqni muhofaza qiluvchi organ xodimlari tomonidan tezkor tadbir davomida, Qarshi shahrida joylashgan “Avto-asl-baraka” MCHJga qarashli jarima maydoni yaqinida fuqaro U.B. YPX xodimiga 2.000.000 (ikki million) soʻm miqdoridagi pullarni chora koʻrilmasligi evaziga pora tariqasida berayotgan vaqtda qoʻlga olingan.

Mazkur holat yuzasidan Qarshi shahar prokuraturasi tomonidan Oʻzbekiston Respublikasi Jinoyat Kodeksining 211-moddasi 1-qismi bilan jinoyat ishi qoʻzgʻatilib, dastlabki tergov harakatlari olib borilmoqda.