Ijtimoiy tarmoqlarda Bogʻot tumanida YPX xodimlari taʼqib qilganligi sabab haydovchi YTHga uchraganligi aytilgan video tarqaldi. Holat aslida qanday sodir boʻlgan?

Joriy yilning 2-fevral kuni soat 16:00 larda, Xorazm viloyati, Bogʻot tumani hududidan oʻtgan 4P-156 avtomobil yoʻlining 28-kilometrida “Nexia” rusumli avtomobil haydovchisi ushbu hududda xizmat olib borayotgan YPX xodimlari J.Yakubov va U.Matturdiyevlarning toʻxtash ishorasiga boʻysunmasdan harakatlangan. YPX xodimlari “Lacetti” rusumli, 90509VSF davlat raqam belgili maxsus xizmat avtomobilida kuzatib borishgan. Haydovchi koʻp masofa yurishga ulgurmasdan, “Nurafshon” mahallasining ichki yoʻliga burilib, yoʻl chetidagi simyogʻochga urilib, YTH sodir etgan. YPX xodimlari tomonidan surishtiruv davomida haydovchi tegishli meʼyoriy hujjatlarsiz va mast holda transport boshqarganligi maʼlum boʻlgan. Holat yuzasidan tegishli hujjatlar rasmiylashtirilib, avtomobil vaqtincha saqlash uchun jarima maydoniga qoʻyilgan.

Barcha haydovchilardan transport vositasini tegishli meʼyoriy hujjatlar bilan, sergak holda boshqarishlarini va tartibga soluvchilarning ishoralariga qatʼiy rioya qilishlarini soʻraymiz.