Surxondaryo viloyati, Termiz shahri, Raʼno Uzoqova koʻchasida xizmat olib borayotgan YPX xodimi O.Abdunazarov tomonidan “Cobalt” rusumli avtomobil toʻxtatilgan. Oʻzaro muloqot jarayonida haydovchining ogʻzidan spirtli ichimlik hidi kelayotganligini xodim payqagan va uni tekshiruvdan oʻtishga taklif qilgan.

“Alkotester” moslamasining natijasiga koʻra, ushbu haydovchi spirtli ichimlikdan mast holdaligi tasdiqlangan. YPX xodimi tomonidan haydovchiga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 131-moddasi tartibida bayonnoma rasmiylashtirilib, avtomobili ushbu Kodeksning 291-moddasiga koʻra, vaqtincha saqlash uchun jarima maydoniga qoʻyilgan.

Haydovchi Surxondaryo viloyati IIB JXX YHXB 1-safarbarlik otryad komandiri B.Yuldashevning oldiga borib, tegishli chora koʻrilmasligini soʻragan va evaziga ikki million soʻm miqdorida pul berishni taklif qilgan.

Shundan soʻng, xodim Surxondaryo viloyati IIB boshligʻi nomiga bildirgi orqali murojaat qilib, pora taklif qilayotgan fuqaroga nisbatan qonuniy chora koʻrilishini soʻragan.

Holat yuzasidan huquqni muhofaza qiluvchi organ xodimlari tomonidan tezkor tadbir davomida, ushbu fuqaro YPX xodimiga ikki million soʻm miqdoridagi pullarni pora tariqasida berayotgan vaqtda qoʻlga olingan.

Hozirda Bosh prokuratura huzuridagi iqtisodiy jinoyatlarga qarshi kurashish departamentining Termiz shahar boʻlimi xodimlari tomonidan Oʻzbekiston Respublikasi Jinoyat Kodeksining 211-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.