2025-yil 16-yanvar kuni Qashqadaryo viloyati, Kitob tumani, “Obod” MFY hududida xizmat olib borayotgan YPX xodimlari tomonidan “Damas” rusumli avtomobil toʻxtatilgan. Tekshiruv davomida haydovchi J.Sh.ning ogʻzidan spirtli ichimlik hidi kelganligi sabab xodimlar uni mastlik holati boʻyicha tekshiruvga taklif qilishgan.

Shundan soʻng, haydovchi va avtomobilda boʻlgan yoʻlovchilar xodimlarga faol qarshilik koʻrsatishgan. Ushbu jarayon atrofdagi fuqarolar tomonidan tasvirga olingan.

Alkotester moslamasi bilan tekshiruv oʻtkazilganda haydovchi J.Sh.da mastlik holati aniqlangan va unga nisbatan MJtKning 131, 194-moddalari bilan maʼmuriy bayonnoma rasmiylashtirilib, avtomobili vaqtincha saqlash uchun jarima maydoniga qoʻyilgan.

Toʻplangan hujjatlar Jinoyat ishlari boʻyicha Kitob tumani sudida koʻrib chiqilib, haydovchi 131, 183, 194-moddalarida koʻrsatilgan huquqbuzarliklarni sodir etgan deb topilgan. Unga nisbatan umumiy hisobda BHMning 28 baravari (10 500 000 soʻm) miqdorida jarima hamda 1 yilu 6 oyga haydovchilik guvohnomasidan mahrum etish jazosi tayinlangan.

Barcha haydovchilardan belgilangan qoidalarga rioya qilishlarini, mast holda transport boshqarmasliklarini va YPX xodimlarining qonuniy talabini bajarishlarini soʻraymiz.