Yoʻllarda mast holda avtomobil boshqargan haydovchilar boʻyicha doimiy ravishda reydlar oʻtkazilmoqda. 2022-yil 24-yanvar kuni soat 01:30 larda, Yashnobod tumani, M.Ulugʻbek koʻchasida toʻxtatilgan “BMW” rusumli avtomobilning 1997-yilda tugʻilgan haydovchisi spirtli ichimlik isteʼmol qilganlikda gumonlanib tekshiruvdan oʻtkazilganda, mastlik holatida ekanligi maʼlum boʻlgan. Unga nisbatan maʼmuriy bayonnoma tuzilib, avtomobil vaqtincha saqlash uchun jarima maydoniga qoʻyilgan.

Maʼlumot oʻrnida, transport vositasi haydovchisi tomonidan chiqarilgan havodagi etanol bugʻlari konsentratsiyasi koʻrsatkichi 0,135 milligramm va undan yuqori boʻlgan hollarda DYHXX xodimi haydovchiga nisbatan alkogolli ichimlik isteʼmol qilganligi fakti yuzasidan Oʻzbekiston Respublikasi Maʼmuriy javobgarlik toʻgʻrisidagi kodeksining 131-moddasiga muvofiq maʼmuriy bayonnoma rasmiylashtiradi.

Oʻzbekiston Respublikasi Maʼmuriy javobgarlik toʻgʻrisidagi kodeksining 131-moddasiga koʻra, haydovchilarning transport vositalarini alkogolli ichimlikdan, giyohvand modda taʼsiridan yoki oʻzgacha tarzda mast holda boshqarishi — transport vositasini boshqarish huquqidan bir yilu olti oydan uch yilgacha muddatga mahrum qilib, bazaviy hisoblash miqdorining yigirma besh baravari miqdorida jarima solishga sabab boʻladi.