IIV JXD Yoʻl harakati xavfsizligi xizmati boshligʻi Sh.Ibragimov hamda Transport vazirligi, Avtomobil yoʻllari qoʻmitasi masʼullari va malakali mutaxassislardan iborat ishchi guruh tomonidan poytaxtimizdagi muammoli chorrahalarda oʻrganish ishlari davom etmoqda.

Bugungi kunda oʻtkazilgan oʻrganish ishlari davomida bir qator muammoli chorrahalarni rekonstruksiya qilish loyihasi va tirbanliklarni oldini olish boʻyicha takliflar muhokama qilindi.

Yoʻl harakati xavfsizligini yaxshilash, transport oqimini optimallashtirish maqsadida bir qator chora-tadbirlar ishlab chiqilmoqda.

Shuningdek, ishchi guruh tomonidan avvalroq oʻrganilgan chorrahalarda belgilangan va boshlab yuborilgan ishlar koʻzdan kechirildi. Xususan, Parkent va Mirzo Ulugʻbek koʻchalari kesishgan chorrahaga oʻrnatilgan maxsus kameralarning tirbandlik vaqtida transportlar hisobini qay darajada olib borishi holati oʻrganilib, amalga oshirilayotgan ishlarning izchil davom etayotgani ham muhokama qilindi.