Ijtimoiy tarmoqda "Toshkent shahrida YPX xodimi va haydovchi o‘rtasida katta tortishuv kelib chiqdi" sarlavhasi ostida video tarqaldi.

2021-yil 28-dekabr kuni Toshkent shahar, Mirobod tumani, Farg‘ona yo‘li va Ulfat ko‘chalari kesishgan chorrahada svetoforning harakatni taqiqlovchi chirog‘iga rioya qilmagan "Lacetti" rusumli avtomobil haydovchisiga YPX xodimi H.Nomozov tomonidan to‘xtash ishorasi ko‘rsatilgan. Haydovchi YPX xodimining qonuniy talabini bajarmasdan harakatda davom etgan. Ko‘rilgan choralar natijasida haydovchi Farg‘ona yo‘li va Mo‘ynoq ko‘chalari kesishgan chorrahada to‘xtatilgan.

O‘zaro muloqot jarayonida haydovchi me’yoriy hujjatlarini YPX xodimiga berishdan bosh tortib, e’tirozlar bildirib, qonuniy talabni bajarmaslikda davom etgan va "102" raqami orqali hududiy IIBga murojaat qilgan. Voqea joyiga profilaktika inspektori ham yetib kelgan. Haydovchi, 1992-yilda tug‘ilgan Sh. M. ga tushuntirishlar berilib, unga nisbatan svetoforning harakatni taqiqlovchi chirog‘iga rioya qilmaganligi va YPX xodimining qonuniy talabiga bo‘ysunmaganligi bo‘yicha ma’muriy bayonnoma tuzilib, "Lacetti" rusumli transport vositasi vaqtincha saqlash uchun jarima maydoniga qo‘yilgan.

O‘z navbatida, barcha haydovchilardan avvalo qoidalarga rioya qilishlarini, qoidalarni chetlab o‘tganda esa, YPX xodimlarining qonuniy talablariga bo‘ysunishlarini so‘raymiz. Qoidabuzarlikni rasmiylashtirish YPX xodimining majburiyati hisoblanadi.